وزیراعلیٰ سے اختلاف کے باوجود صوبے میں امن و خوشحالی میں رکاوٹ نہیں ڈالیں گے گورنر کے پی

گورنر کے پی نے بیان میں خیرسگالی کا پیغام دیا—فوٹو: فائل

---

خیبرپختونخوا کے گورنر فیصل کریم کنڈی نے وزیراعلیٰ علی امین گنڈاپور کے ساتھ لفظی گولہ باری ختم کرتے ہوئے کہا ہے کہ سیاسی اختلاف کے باوجود گورنر ہاؤس صوبے میں امن اور خوش حالی میں کوئی رکاوٹ نہیں ڈالیں گے۔

گورنر فیصل کریم کنڈی نے کہا کہ وزیراعلیٰ سے سیاسی اختلافات اپنی جگہ لیکن گورنر ہاﺅس صوبے میں امن اور عوامی خوش حالی میں کوئی رکاوٹ نہیں ڈالے گا۔

خیال رہے کہ خیبرپختونخوا کے ایک ہی ضلع سے تعلق رکھنے والے گورنر اور وزیراعلیٰ گورنر کے حلف کے بعد مسلسل ایک دوسرے سے الجھے رہے ہیں اور صوبے کے دونوں بڑوں نے ایک دوسرے پر لفظی گولہ باری کرتے ہوئے سیاسی ماحول گرم رکھا تھا۔

گورنر کی جانب سے خیرسگالی کے پیغام کے بعد وزیراعلیٰ کا ردعمل بھی آنے کا امکان ہے۔