پنجاب میں 4 اگست تک بارشیں جاری رہنے کا امکان

پنجاب بھر میں مون سون بارشوں کا اسپیل 4 اگست تک جاری رہنے کا امکان ہے۔


ترجمان پی ڈی ایم اے کے مطابق آئندہ 24 گھنٹوں میں پنجاب کے بیشتر اضلاع میں مون سون بارش کا امکان ہے۔ مون سون بارشوں کے باعث دریاؤں، ڈیمز اور ندی نالوں میں پانی کی سطح میں اضافہ ہورہا ہے۔ یکم سے 4 اگست تک دریائے جہلم میں منگلا کے مقام پر درمیانے سے اونچے درجے کی سیلابی صورتحال بن سکتی ہے۔ ممکنہ سیلابی خطرے کے پیش نظر انتظامات مکمل کر لیے گئے ہیں۔

پی ڈی ایم اے کے مطابق دریائے سندھ میں تربیلا اور کالا باغ کے مقام پر نچلے درجے کی سیلابی صورتحال ہے۔ دریائے چناب میں مرالہ ، خانکی اور قادر آباد کے مقام پر بھی سیلاب کا خدشہ ہے۔ انتظامیہ اور متعلقہ محکمے الرٹ ہیں۔ شہری موسم برسات کے دوران احتیاطی تدابیر اختیار کریں اور ہدایات پر عمل کریں۔ کسی ایمرجنسی کی صورت میں پی ڈی ایم اے کی ہیلپ لائن 1129 پر رابطہ کریں۔