ڈھاکا میں بھارتی ثقافت کے فروغ کیلئے قائم اندرا گاندھی کلچرل سینٹر نذر آتش
بھارت اور بنگلا دیش کے درمیان ثقافتی تعلقات کے فروغ کے لیے 2010 میں کیا گیا سینٹر نذر آتش کردیا گیا
بنگلہ دیش میں حسینہ واجد کے استعفے کے بعد بھی مظاہرین کا غصہ نہیں تھم رہا اور منگل کو مشتعل عوام نے بھارت کے ساتھ ثفاقتی تعلقات کے فروغ کے لیے دارالحکومت ڈھاکا کے علاقے دھانموندی میں قائم اندراگاندھی کلچرل سینٹر (آئی جی سی سی) نذر آتش کردیا۔
بھارتی میڈیا کی رپورٹ کے مطابق مشتعل ہجوم نے ڈھاکا کے علاقے دھانموندی میں واقع اندراگاندھی کلچرل سینٹر پر چڑھائی کردی اور آگ لگا دی، مشتعل افراد نے اس کے علاوہ دارالحکومت کے دیگر کئی مقامات بشمول بنگابندھو میموریل میوزیم (بنگابندھو بھابن) پر آگ لگادی۔
بنگابندھو بھابن مستعفی وزیراعظم حسینہ واجد کے والد شیخ مجیب الرحمان کی یاد میں تعمیر کیا گیا تھا، جنہیں 1975 میں قتل کردیا گیا تھا جب وہ ملک کے صدر تھے۔
غیرملکی خبرایجنسی کی جانب سے جاری کی گئیں ویڈیوز میں دیکھا جاسکتا ہے کہ کتابیں اور دیگر اشیا آگ کی نذر ہو رہی ہیں۔
خیال رہے کہ اندراگاندھی کلچرل سینٹر کا افتتاح مارچ 2010 میں بنگلا دیش اور بھارت کے درمیان ثقافتی رابطوں کے فروغ کے مقصد کے تحت کیا گیا تھا اور اس کے زیر انتظام ثقافتی پروگرام، سیمینارز، ورکشاپس، بھارتی ماہرین، پروفیشنلز اور یوگا ٹرینرز سے مصروفیات، ہندی، بھارتی کلاسیکل موسیقی اور کتھک اور منی پوری بھارتی ڈانسز کی تربیت بھی شامل تھی۔