داعش کی جانب سے اغوا کی گئی 46 بھارتی نرسوں کو رہا کردیا گیا

داعش جنگجوؤں کی جانب سے بھارتی نرسوں کو جمعرات کواغواگیا گیاتھا۔ فوٹو؛فائل

---

دولت اسلامی عراق و شام (داعش) کے جنگوؤں کی جانب سے عراق کے شمالی شہر تکریت سے اغوا کی گئی 46 بھارتی نرسوں کو رہا کردیا گیا۔

غیر ملکی خبررساں ایجنسی کے مطابق عراق اور شام میں اسلامی ریاست کے قیام کے لئے حکومت کے خلاف برسر پیکار دولت اسلامی عراق و شام (داعش) نے تکریت سے اغوا کی گئی بھارت سے تعلق رکھنے والی 46 نرسوں کو بھارتی حکام کے حوالے کردیا جس کے بعد بھارتی حکام کی جانب سے تمام نرسوں کو عربیل کے ہوائی اڈے پر پہنچا دیا گیا ہے۔ بھارتی میڈیا کے مطابق داعش جنگوؤں سے رہائی پانے والی نرسیں کل ریاست کیرالہ کے شہر کوچی پہنچیں گی۔

واضح رہے کہ بھارتی نرسیں سابق صدر صدام حسین کے آبائی شہر تکریت میں ایک اسپتال میں کام کررہی تھیں، اس شہر پر بھی گذشتہ ماہ دولت اسلامی کے جنگجوؤں نے قبضہ کرلیا تھا، مغوی نرسوں کا تعلق بھارتی ریاست کیرالہ سے ہے اور انہیں داعش جنگجوؤں کی جانب سے جمعرات کواغواگیا گیاتھا۔