کراچی میں اہل سنت والجماعت کے جنرل سیکریٹری تاج محمد حنفی کی گاڑی پر فائرنگ

تاج محمد حنفی سمیت گاڑی میں موجود تمام افراد محفوظ رہے

---

اورنگی ٹاؤن کے علاقے پونے پانچ نمبر کے قریب ہفتہ اور اتوار کی درمیانی شب نامعلوم موٹرسائیکل سوار ملزمان نے اہلسنت والجماعت کے جنرل سیکریٹری تاج محمد حنفی کی گاڑی پر فائرنگ کی۔

تاہم خوش قسمتی سے تاج محمد حنفی سمیت گاڑی میں موجود تمام افراد محفوظ رہے ، ترجمان اہلسنت و الجماعت امیر معاویہ نے ایکسپریس سے گفتگو کرتے ہوئے بتایا کہ تاج محمد حنفی فائرنگ سے محفوظ رہے ۔ حملہ آور دو موٹرسائیکلوں پر سوار 4 افراد تھے جو فائرنگ کرتے ہوئے فرار ہوگئے۔

انہوں نے بتایا کہ تاج محمد حنفی کے سیکیورٹی گارڈ نے صرف اپنا اسلحہ فائرنگ کرنے والوں کی طرف تانا تھا فائرنگ نہیں کی۔

ان کا کہنا تھا کہ جنرل سیکریٹری تاج محمد حنفی کو قتل کرنے یا خوف وہراس پھیلانے کے لئے ان پر فائرنگ کی گئی۔

ترجمان کے مطابق اورنگی ٹاؤن سیکٹر ساڑھے گیارہ نمبر اسلام چوک پر شہدائے اسلام کانفرنس منعقد کی گئی تھی ، تاج محمد حنفی کانفرنس میں شرکت کے بعد واپس جا رہے تھے ۔