لاہور بیوی پر بہیمانہ تشدد کرنے والا شوہر گرفتار
ورچوئل ویمن پولیس اسٹیشن کی بدولت ملزم پولیس کی گرفت میں آگیا
غازی آباد کے علاقے میں بیوی پر تشدد کرنے پر پولیس نے شوہر کو گرفتار کرلیا۔
ورچوئل ویمن پولیس اسٹیشن کی جانب سے تشدد کی کال موصول ہوئی جس سے معلوم ہوا کہ شوہر کے بہیمانہ تشدد سے خاتون کی آنکھ اور چہرہ بری طرح زخمی ہوگیا ہے، خاتون بھاگ کر پناہ لینے کی خاطر ہمسائے کے گھر چلی گئی۔
ہمسایہ کی جانب سے ورچوئل ویمن پولیس اسٹیشن پر خاتون پر تشدد کی کال کی گئی جس پر پولیس نے ہمسایہ کو خاتون کو پناہ دینے کا کہا اور پولیس کو موقع پر روانہ کیا۔
پولیس نے موقع پر پہنچ کر شوہر کو گرفتار کرکے ملزم کے خلاف قانونی کارروائی کا آغاز کر دیا۔ ورچوئل ویمن پولیس اسٹیشن کی بدولت ملزم پولیس کی گرفت میں آگیا۔
ترجمان سیف سٹیز کے مطابق سیف سٹی ورچوئل ویمن پولیس اسٹیشن خواتین کے تحفظ کے لیے 24 گھنٹے مصروف عمل ہے، خواتین فوری مدد کے لیے 15 ایمرجنسی نمبر پر 2 دبا کر ورچوئل ویمن پولیس اسٹیشن سے رابطہ کر سکتیں ہیں۔