بھارت کے یومِ آزادی پر مقبوضہ کشمیر میں یوم سیاہ منایا جا رہا ہے

وادی میں مکمل ہڑتال کی گئی اور جگہ جگہ سیاہ پرچم لہرائے گئے

ویب ڈیسک August 15, 2024

وادی میں مکمل ہڑتال کی گئی اور جگہ جگہ سیاہ پرچم لہرائے گئے

آج 15 اگست کو بھارت کے یومِ آزادی کے موقع پر مقبوضہ کشمیر کے غیور اور بہادر عوام یومِ سیاہ منا رہے ہیں۔

کشمیر میڈیا سروس کے مطابق حریت قیادت کی کال پر مقبوضہ وادی میں مکمل ہڑتال ہے۔ تعلیمی ادارے ، دکانیں اور کاروباری مراکز بند ہیں اور ٹرانسپورٹ معطل ہے۔ بھارتی مظالم اور غاصبانہ قبضے کے خلاف کشمیریوں نے گھروں پر سیاہ پرچم لہرا دیے۔

قابض بھارتی فورسز نے کشمیریوں کو احتجاج سے روکنے کے لیے سیکورٹی مزید سخت کرتے ہوئے اضافی نفری تعینات کردی ہے۔اہم شاہراہوں کو خاردار تار لگا کر بند کردیا گیا ہے۔ مختلف علاقوں میں موبائل اور انٹرنیٹ سروس بند کردی گئی ہے۔ متعدد نوجوانوں کو گرفتار کرلیا گیا ہے۔

کشمیر کی آزادی کے لیے آواز اٹھانے والے یاسین ملک ، آسیہ اندرابی اور دیگر رہنما برسوں سے بھارتی جیلوں میں بدترین مظالم کا سامنا کررہے ہیں۔ بھارت کے قبضے سے آزادی کے لیے اب تک ایک لاکھ سے زائد کشمیری اپنی جانوں کا نذرانہ دے چکے ہیں۔

مقوضہ کشمیر کو کالے قانون کے تحت وفاق کی اکائی تسلیم کرکے وہاں جھرلو الیکشن کرائے گئے تھے۔ عوام کے الیکشن کے بائیکاٹ سے نالاں مودی سرکار نے وادی کو قید خانے میں تبدیل کردیا ہے اور قدم قدم بھارتی فوجی تعینات ہیں۔