خاتون ٹک ٹاک اسٹار کی نازیبا تصاویر وائرل کرنیوالے ملزم کو 9 سال قید

ملزم نے ٹک ٹاکر کو جوس میں نشہ آور دوائی ملا کر پلائی تھی

کورٹ رپورٹر August 16, 2024

ملزم کو ایف آئی اے سائبر کرائم سرکل نے گرفتار کیا تھا : فوٹو : ویب ڈیسک

جوڈیشل مجسٹریٹ شرقی نے خاتون ٹک ٹاک اسٹار کی نازیبا تصاویر وائرل کرنے کے مقدمے میں ملزم کو مجموعی طور پر 9 سال قید کی سزا سنا دی۔

تفصیلات کے مطابق کراچی میں جوڈیشل مجسٹریٹ شرقی نے خاتون ٹک ٹاک اسٹار کی نازیبا تصاویر وائرل کرنے کے مقدمے کا فیصلہ سنا دیا، استغاثہ الزامات ثابت کرنے میں کامیاب رہا۔

عدالت نے ملزم الطاف علی کو مجموعی طور پر 9 سال قید کی سزا سنادی، عدالت نے ملزم پر مجموعی طور پر 60 ہزار روپے جرمانہ بھی عائد کردیا، عدالت نے فیصلے میں کہا ہے کہ جرمانہ کی عدم ادائیگی پر ملزم کو اضافی سزا بھگتنا ہوگی، ملزم نے خاتون کی تصاویر وائرل کرکے اس کے وقار کو مجروح کیا۔

مدعی ٹک ٹاکر اسٹار نے ایف آئی اے سائبر کرائم سرکل میں شکایت درج کروائی تھی، مدعی کا کہنا تھا کہ ملزم نے ایک پراجیکٹ میں ساتھ کام کرنے کے لیے گھر بلایا تھا اور ہمیں جوس میں نشہ آور دوائی ملا کر پلائی جس سے میں اور میری والدہ بے ہوش ہوگئی تھیں۔

ٹک ٹاکر کے مطابق جب میں اور میری والدہ ہوش میں آئیں تو معلوم ہوا کہ ہماری غیر اخلاقی تصاویر ملزم کے موبائل میں ہیں، تصاویر دوسرے لوگوں سے بھی شیئر کی گئی تھیں۔

ملزم کو ایف آئی اے سائبر کرائم سرکل نے گرفتار کیا تھا، ملزم کو پیکا ایکٹ کے تحت سزائیں سنائی گئی۔