ٹیسٹ سیریز قومی ٹیم کے کون سے کرکٹرز کے پاس ریکارڈ بنانے کا موقع ہے

بنگلادیش کیخلاف سیریز کا پہلا ٹیسٹ 21 اگست سے راولپنڈی میں شروع ہوگا

ویب ڈیسک August 17, 2024

بنگلادیش کیخلاف سیریز کا پہلا ٹیسٹ 21 اگست سے راولپنڈی میں شروع ہوگا (فوٹو: فائل)

آئی سی سی ورلڈ ٹیسٹ چیمپئین شپ میں شریک قومی ٹیم کے کرکٹرز بنگلادیش کیخلاف 2 میچز کی ٹیسٹ سیریز میں کچھ ریکارڈ بناسکتے ہیں۔

بنگلادیش کیخلاف ہوم سیریز کے پہلے ٹیسٹ میچ کا آغاز 21 اگست سے راولپنڈی میں ہوگا جبکہ دوسرا ٹیسٹ 30 اگست کو کراچی کے نیشنل اسٹیڈیم میں کھیلا جائے گا۔

سیریز کے دوران فاسٹ بولر شاہین شاہ آفریدی ورلڈ ٹیسٹ چیمپئین شپ میں 100 وکٹیں لینے والے پہلے پاکستانی بالر بننے کا اعزاز حاصل کرسکتے ہیں، وہ اسوقت 24 ٹیسٹ میچز میں 91 وکٹوں کیساتھ ایلیٹ بالرز کی فہرست میں شامل ہیں۔

مزید پڑھیں: 'بابراعظم کی وکٹ لینا! کس بالر کا خواب ہے'

ڈبلیو ٹی سی سائیکل میں اب تک 11 گیند بازوں نے 100 وکٹوں کا ہندسہ عبور کیا ہے، جن میں بھارت کے 3- روی ایشون 174، جسپریت بمراہ 110 اور رویندرا جڈیجا 102 وکٹوں کیساتھ موجود ہیں جبکہ 4 آسٹریلوی بالرز بھی یہ کارنامہ سرانجام دے چکے ہیں ان میں نیتھن لیون 187، پیٹ کمنز 175، مچل اسٹارک 147 اور جوش ہیزل ووڈ 109 وکٹوں کیساتھ فہرست میں شامل ہیں۔

مزید پڑھیں: شان مسعود نے 6 فاسٹ بولرز کو لیکر اہم بات کہہ ڈالی

پاکستان کی جانب سے ورلڈ ٹیسٹ چیمپئین شپ میں گرین شرٹس کیلئے شاہین کے بعد نسیم شاہ کا نمبر آتا ہے جنہوں نے 51 وکٹیں حاصل کررکھی ہیں جبکہ انجری کے باعث انہوں نے اپنا آخری میچ جولائی 2023 میں سری لنکا کے خلاف کھیلا تھا۔

مزید پڑھیں: خراب فارم برقرار! بابراعظم، خرم شہزاد کو بھی کھیلنے سے قاصر

دوسری جانب کپتان شان مسعود اور نائب کپتان سعود شکیل کے پاس بھی ڈبلیو ٹی سی سائیکل میں 1 ہزار رنز تک پہنچنے کا موقع موجود ہے۔ شان مسعود نے 18 میچوں میں 985 جبکہ سعود شکیل نے 10 ٹیسٹ میچوں میں 967 رنز بنائے ہیں۔