زیادتی کے بعد قتل ہونے والی ڈاکٹر کی آخری خواہش ڈائری منظرِعام پرآگئی

کلکتہ کے اسپتال میں لیڈی ڈاکٹر کو اجتماعی زیادتی کے بعد بیدردی سے قتل کردیا گیا تھا، فوٹو: فائل

---

بھارتی ریاست مغربی بنگال کے دارالحکومت کے ایک اسپتال میں اجتماعی زیادتی کے بعد بیدردی سے قتل ہونے والی ڈاکٹر کی ڈائری کا آخری صفحہ منظر عام پر آگیا۔

بھارتی میڈیا کے مطابق جنسی زیادتی کے بعد قتل ہونے والی لیڈی ڈاکٹر پُرعزم خاتون تھیں جنھوں نے زندگی کے کچھ اہداف مقرر کر رکھے تھے اور جن کے حصول کے لیے وہ دن میں 10 سے 12 گھنٹے تک مسلسل پڑھا کرتی تھی۔

مقتولہ کے والد نے اپنی بیٹی کے ڈائری کے آخری صفحے کے بارے میں میڈیا کو بتایا کہ بیٹی نے لکھا کہ وہ ایم ڈی کورس کے امتحان میں ٹاپ کرکے میڈیکل کے شعبے میں قوم اور ملک کی خدمت کرنا چاہتی ہے۔

لیڈی ڈاکٹر کے والد نے بتایا کہ ان کی بیٹی نے تعلیمی میدان میں ہمیشہ سے سخت محنت کی تھی اور اب ایم ڈی کر رہی تھی۔ وہ بڑی محنت کے بعد یہاں تک پہنچی تھی۔ ہم نے بھی بطور والدین اپنی بیٹی کی پڑھائی کے لیے دن رات ایک کردیئے تھے۔

مقتولہ والد نے مزید بتایا کہ میری بیٹی کے خواب کو ایک آن میں ختم کردیا گیا۔ ہماری قربانیاں رائیگاں چلی گئیں۔ میں بس انصاف چاہتا ہوں کہ آئندہ کسی اور کی بیٹی کے ساتھ ایسا نہ ہو۔