بھارت میں ایک اور فوجی نے پھندا لگا کر خودکشی کرلی

بھارت میں پست ہمتی، افسران کے ناروا سلوک اور ذہنی دباؤ کے باعث فوجی اہلکاروں میں خودکشی کے واقعات عام ہیں

ویب ڈیسک August 19, 2024

بھارتی فوجیوں میں پست ہمتی اور ذہنی دباؤ کے باعث خودکشی کے واقعات عام ہیں، فوٹو: فائل

بھارتی ریاست اوڈیشہ کے فوجی کیمپ میں ایک اہلکار نے چھت کے پنکھے سے لٹک کر اپنی زندگی کا خاتمہ کرلیا۔

کشمیر میڈیا سروس کے مطابق خودکشی کرنے والا سینٹرل ریزرو پولیس فورس کی بٹالین 64 میں تعینات تھا جو نیکسل باغیوں کے خلاف کارروائی کرتی ہے۔

خودکشی کرنے والے اہلکار کی شناخت ارجن چرن نائیک کے نام سے ہوئی۔ کمرے سے کوئی خودکشی نوٹ برآمد نہیں ہوا۔

پوسٹ مارٹم میں موت کی وجہ گلا گھٹنا آئی ہے جس سے خودکشی کی تصدیق ہوگئی۔ تاحال خودکشی کے محرک کا پتا نہیں چل سکا۔

پولیس نے مقدمہ درج تحقیقات کا آغاز کردیا تاہم اس قسم کے واقعات میں اب تک کسی انکوائری کمیٹی کی ٹھوس رپورٹ سامنے نہیں آئی۔

لاش کو پوسٹ مارٹم اور ضروری کارروائی کے بعد آبائی گاؤں روانہ کردیا گیا۔

خیال رہے کہ بھارت میں پست ہمتی، افسران کے ناروا سلوک اور ذہنی دباؤ کے باعث فوجی اہلکاروں میں خودکشی کے واقعات عام ہیں۔