کراچی میں تیز رفتار خاتون کار سوار نے کئی لوگوں کو روند دیا خاتون اور بزرگ جاں بحق
حادثے میں تین شہری زخمی، ایک گاڑی اور پانچ موٹرسائیکلوں کو بھی نقصان پہنچا ہے
شہر قائد کے علاقے کار ساز کے قریب سروس روڈ پر خاتون ڈرائیور سے لینڈ کروز نے قابو ہوگئی جس کے نتیجے میں موٹر سائیکل سوار باپ اور بیٹی جاں بحق جبکہ ایک شہری زخمی ہوگیا ، حادثے میں ایک کار بھی تباہ ہوگئی۔
تیز رفتاری کے بعد لینڈ کروزز بھی خاتون ڈرائیور سے قابو ہو کر الٹ گئی، واقعہ کے بعد عوام کی بڑی تعداد جائے وقوعہ پر جمع ہوگئی اور خاتون ڈرائیور کو اپنے گھیرے میں لے لیا بعدازاں پولیس اور رینجرز کی بھی بھاری نفری موقع پر پہنچ گئی اور حادثے کی زمہ دار خاتون ڈرائیور کو حراست میں لیکر بذریعہ پولیس موبائل بہادر آباد تھانے منتقل کر دیا جبکہ الٹنے والی لینڈ کروز رجسٹریشن نمبر بی وائی 0033 کو کرین کی مدد سے سیدھا کر کے اسے بھی تھانے منتقل کر دیا گیا۔
اس حوالے سے ایس ایچ او بہادر آباد نعیم راجپوت نے بتایا کہ زیر حراست خاتون ڈرائیور کی شناخت نتاشا کے نام سے ہوئی ہے جبکہ حادثے میں 2 موٹر سائیکلیں اور کار بھی تباہ ہوئی ہے جبکہ خاتون ڈرائیور سے لینڈ کروزر بے قابو ہونے کے واقعہ میں موٹر سائیکل پر سوار باپ اور بیٹی جاں بحق ہوگئے ، متوفین کی لاشیں ضابطے کی کارروائی کے لیے جناح اسپتال منتقل کر دی گئیں جہاں ان کی شناخت 62 سالہ عمران عارف اور اس کی بیٹی 23 سالہ آمنہ کے نام سے شناخت کیا گیا جو کہ گلزار ہجری اسکیم 33 یاسر ویو اپارٹمنٹ کے رہائشی بتائے جائے ہیں تاہم فوری طور پر یہ معلوم نہیں ہو سکا کہ دونوں باپ اور بیٹی یہاں کس کام سے آئے تھے جس کی معلومات حاصل کی جا رہی ہے۔
حادثے میں 55 سالہ عبدالسلام زخمی ہوا ہے جسے طبی امداد فراہم کی جا رہی ہے ، پولیس نے ضابطے کی کارروائی کے بعد جاں بحق باپ اور بیٹی کی لاشیں ورثا کے حوالے کر دیں۔
پولیس کے مطابق خاتون ڈرائیور کے پاس سے غیر ملکی ڈرائیونگ لائسنس ملا ہے جبکہ ایس ایس پی ایسٹ کا کہنا ہے کہ خاتون حواس باختہ ہے جس کا میڈیکل کرایا جا رہا ہے اور اس کی رپورٹ آنے کے بعد مزید صورتحال واضح ہو جائیگی۔ حادثے کی اطلاع ملنے پر متوفین کے گھر میں کہرام مچ گیا اور خواتین شدت غم سے نڈھال ہوگئیں جبکہ اہل محلہ کی بڑی تعداد ان کی رہائش گاہ پر جمع ہوگئی اور واقعہ پر افسوس اور دکھ کا بھی اظہار کیا ۔