ہراسانی کے بڑھتے واقعات سحرخان نے اپنی حفاظت کیلئے ٹَیزر خرید لیا

ٹَیزر ایک ایسا آلہ ہے جس سے تیز کرنٹ نکلتا ہے

ویب ڈیسک August 21, 2024

سحر خان ہراسانی کے بڑھتے واقعات سے پریشان ہوگئیں : فوٹو : ویب ڈیسک

پاکستانی ڈرامہ انڈسٹری کی نئی اُبھرتی ہوئی خوبرو اداکارہ سحر خان نے ہراسانی کے بڑھتے واقعات سے پریشان ہوکر اپنی حفاظت کے لیے 'ٹَیزر' خرید لیا۔

کراچی سمیت ملک کے بیشر شہروں میں خواتین کو ہراساں کرنے کے واقعات تیزی سے بڑھ رہے ہیں، ہر گزرتے دن کے ساتھ، ہراسانی کا کوئی نہ کوئی واقعہ رپورٹ ہوتا ہے۔

ہراسانی کے واقعات میں اضافے کی سب سے بڑی وجہ یہ ہے کہ پولیس اس جرم میں ملوث ملزمان کو پکڑنے میں ناکام ہے، ملزمان دن دیہاڑے خواتین کو ہراساں کررہے ہیں اور پھر کُھلے عام گھوم رہے ہیں۔

اب اس حوالے سے معروف پاکستانی اداکارہ سحر خان نے ایک اہم اقدام کیا ہے، اداکارہ نے اپنے آفیشل انسٹاگرام ہینڈل کی اسٹوری میں جاری کیے گئے پیغام میں کہا کہ ملک میں ہراسانی کے واقعات میں اضافہ ہوچکا ہے لہٰذا میری تمام لڑکیوں اور خواتین سے گزارش ہے کہ وہ اپنی حفاظت کے معاملے پر سنجیدگی کا مظاہرہ کریں اور اس میں کوئی کوتاہی نہ برتیں۔

مزید پڑھیں: باحجاب خاتون کی ہراسگی کا واقعہ؛ کاش قتل کی اجازت ہوتی، زارا نور کا اظہار برہمی

سحر خان نے کہا کہ میں نے اپنے دفاع کے لیے ٹَیزر خرید لیا ہے اور میں ہر لڑکی سے بھی یہی کہنا چاہوں گی کہ آپ بھی اپنی حفاظت کے لیے کوئی آلہ یا ٹَیزر اپنے ساتھ رکھیں کیونکہ اسی طرح آپ اپنی حفاظت کرسکتی ہیں۔

اداکارہ نے کہا کہ میں نے یہ ٹَیزر آن لائن منگوایا ہے، آپ بھی آن لائن شاپنگ کے ذریعے یہ آلہ خرید سکتی ہیں، اس کی قیمت بھی مناسب ہے۔

اُنہوں نے مزید کہا کہ میں نے اپنی بہنوں کو بھی اپنی حفاظت کی تاکید کی ہے اور تمام خواتین سے بھی کہہ رہی ہوں کہ آپ اپنے تحفظ کے لیے خود تیار رہیں کیونکہ یہاں کوئی کسی کو تحفظ فراہم نہیں کرتا۔

واضح رہے کہ ٹَیزر ایک ایسا آلہ ہے جس سے تیز کرنٹ نکلتا ہے، یہ آلہ عموماً خواتین اپنے دفاع کے لیے رکھتی ہیں جبکہ مغربی ممالک کی پولیس بھی جرائم کی روک تھام کے لیے یہ آلہ استعمال کرتی ہے۔