دبنگ خان اور کنگ خان ایک مرتبہ پھر گلے تو ملے لیکن دل نہیں ملائے

چندبرسوں قبل کترینہ کیف کی سالگرہ کی تقریب میں سلمان خان اور شاہ رخ خان کےدرمیان جھگڑا ہوگیا تھا فوٹو: فائل

---

بالی ووڈ کے دبنگ خان اور کنگ خان کے درمیان رنجشوں سے کون واقف نہیں لیکن دونوں اداکار جہاں بھی ملتے ہیں بڑی گرم جوشی سے ملتے ہیں۔

بالی ووڈ کے دو سپر اسٹار سلمان خان اور شاہ رخ خان کے درمیان چند برس قبل بڑی گہری دوستی تھی لیکن پھر ایک وقت ایسا آیا کہ ان کے درمیان رنجشیں بھی اپنی انتہا کو پہنچیں۔ دونوں اداکاروں کے درمیان جاری عداوت سے پوری دنیا ہی واقف ہے دونوں ایک دوسرے کو نیچا دکھانے کے لئے کوئی موقع ہاتھ سے جانے نہیں دیتے لیکن جب تقریبات میں ملتے ہیں تو اتنی گرم جوشی سے ملتے ہیں کہ دیکھنے والے ششدر رہ جاتے ہیں۔

گزشتہ برس ممبئی سے تعلق رکھنے والے ایک مسلمان سیاستدان بابا صدیقی کی افطار پارٹی میں دونوں خان شریک ہوئے تو ایک دوسرے سے گلے بھی ملے لیکن دل نہ مل پائے۔ اب ایک سال بعد پھر وہی بابا صدیقی تھے اور ان کی افطار پارٹی میں دبنگ اور کنگ بھی موجود تھے اور دونوں ایک دوسرے سے بغل گیر بھی ہوئے، اس بار بھی لگتا ہے کہ دونوں اداکاروں نے بڑی اداکاری کی۔

واضح رہے کہ چند برس قبل کترینہ کیف کی سالگرہ کی تقریب میں سلمان خان اور شاہ رخ خان کے درمیان جھگڑاہوگیا تھا جس کے بعد دونوں کے درمیان لفظی نوک جھونک چلتی رہتی تھی تاہم دو برسوں سے دونوں جہاں بھی ملتے ہیں بڑے پرتپاک انداز سے ہی ملتے ہیں۔