مائیکروچپ نے بلے کو اپنی مالکن سے 11 سال بعد ملا دیا

امریکا میں ایک شہری خاتون کو تقریباً 11 سال بعد اپنا پالتو بِلا ایک مائیکروچپ کی مدد سے مل گیا۔

جینیفر ریوینل کے پالتو بلے سیم کو لاپتہ ہوئے ایک دہائی سے زیادہ کا عرصہ گزر چکا تھا تاہم 11 سال بعد حیرت انگیز طور پر دونوں مِل گئے۔

جینیفر نے 2011 میں جنوبی کیرولائنا میں سیم کو گود لیا تھا لیکن دو سال بعد وہ غائب ہو گیا جب پالتو کتے نے اسے ڈرایا۔


جینیفر نے بتایا کہ میں نے سیم کو جنگلوں کو تلاش کیا، جگہ جگہ سب سے پوچھا لیکن کسی نے اسے نہیں دیکھا۔

تاہم سیم کو جولائی کے آخر میں ایک شہری نے بلے کو لاوارث دیکھ کر اینیمل کنٹرول ادارے چارلسٹن اینیمل سوسائٹی کے حوالے کر دیا تھا۔ اینیمل شیلٹر نے بلے میں مائیکروچپ دیکھی جس کی مدد سے ادارے نے جینیفر کو فون کرکے بلے کا پتہ دیا۔

جینیفر جب شیلٹر پہنچیں تو وہ اپنے بلے کو 11 سال بعد دیکھ کر رو پڑیں اور بلے کو پکارا سیم، اوہ سیم! میں نے تمہیں بہت یاد کیا۔