ملک کے بیشتر علاقوں میں موسم گرم و مرطوب رہنے کا امکان

25 اگست سے جنوب مشرقی زیریں سندھ میں طوفانی بارش کی پیشگوئی

ویب ڈیسک August 25, 2024

چند علاقوں میں آندھی اور گرج چمک کے ساتھ بارش ہو سکتی ہے : فوٹو : فائل

ملک کے بیشتر علاقوں میں موسم گرم اور مرطوب رہنے کا امکان ہے۔

محکمہ موسمیات کے مطابق سندھ، بالائی خیبر پختونخوا، مشرقی بلوچستان، مشرقی پنجاب، خطہ پوٹھوہار، اسلام آباد اور آزاد کشمیر میں چند مقامات پر تیز ہواؤں اور گرج چمک کے ساتھ بارش کی توقع ہے۔

25 اگست سے جنوب مشرقی زیریں سندھ میں کہیں کہیں طوفانی بارش کی پیشگوئی ہے، شدید طوفانی بارشوں کے باعث نشیبی علاقے زیرِ آب آنے کا خطرہ ہے۔

شدید بارشوں، آندھی، جھکڑ چلنے اور گرج چمک کے باعث روزمرہ کے معمولات متاثر ہونے، کمزور انفرا اسٹرکچر ( کچے گھر، دیواریں ،بجلی کے کھمبے، بل بورڈز، گاڑیوں اور سولر پینل وغیرہ) کو نقصان اور سڑکوں کی بندش کا اندیشہ ہے۔

محکمہ موسمیات کا کہنا ہے کہ اسلام آباد اور گردونواح میں موسم مرطوب اور مطلع جزوی ابرآلود رہنے کے علاوہ دوپہر، شام میں تیز ہواؤں، جھکڑ چلنے اور گرج چمک کے ساتھ چند مقامات پر ہلکی بارش ہو سکتی ہے۔

خیبرپختونخوا کے بیشتر اضلاع میں مطلع جزوی ابر آلود رہنے کے علاوہ مردان، صوابی، نوشہرہ، چارسدہ، چترال، دیر، سوات، مالاکنڈ، مانسہرہ، ایبٹ آباد، پشاور، کوہاٹ، وزیرستان اور کرم میں چند مقامات پر تیز ہواؤں اور گرج چمک کے ساتھ بارش کا امکان ہے۔