ویمنز ٹی20 ورلڈکپ فاطمہ ثنا کو گرین شرٹس کی کپتانی کریں گی

پاکستان کرکٹ بورڈ (پی سی بی) نے آئی سی سی ویمنز ٹی20 ورلڈکپ 2024 کیلئے ویمنز ٹیم کی قیادت کے فرائض نوجوان فاطمہ ثنا کو سونپ دیے۔

بورڈ کی جانب سے جاری کردہ اعلامیے میں کہا گیا ہے کہ 22 سالہ فاطمہ ثنا کو سینئیر کرکٹر ندا ڈار کی جگہ کپتانی کے فرائض سونپ دیے گئے ہیں اور یہ فیصلہ سلیکشن کمیٹی نے متفقہ طور پر کیا ہے۔

فاطمہ ثنا 41 ون ڈے انٹرنیشنل اور 40 ٹی20 انٹرنیشنل میچز میں پاکستان کی نمائندگی کرچکی ہیں جبکہ ایمرجنگ اور ڈومیسٹک ٹیموں کی قیادت فرائض بھی سرانجام دے چکی ہیں۔

مزید پڑھیں: ندا ڈار کو ویمنز ٹی20 ٹیم کی کپتانی سے ہٹانے کا فیصلہ

آئی سی سی ویمنز ٹی20 ورلڈکپ رواں برس 3 سے 20 اکتوبر تک متحدہ عرب امارات (یو اے ای) میں کھیلا جائے گا۔

فاطمہ ثنا نے دسمبر 2023 میں نیوزی لینڈ کے خلاف ہیگلے اوول کے ون ڈے انٹرنیشنل میں پاکستان ٹیم کی کپتانی کی تھی یہ میچ سپر اوور میں پاکستان کی شاندار جیت کی وجہ سے یاد رکھا جاتا ہے۔

مزید پڑھیں: انٹرنیشنل کرکٹ کونسل نے ویمنز ٹی20 ورلڈکپ کا مقام تبدیل کردیا


فاطمہ ثنا 37 سالہ آل راؤنڈر ندا ڈار کی جگہ قیادت سنبھالیں گی جنہوں نے بسمہ معروف سے تینوں فارمیٹ کی کپتانی سنبھالی تھی۔ ندا ڈار موجودہ ٹیم میں شامل ہیں وہ 112 ون ڈے انٹرنیشنل اور 153 ٹی20 انٹرنیشنل کھیل چکی ہیں۔

واضح رہے کہ پاکستان ٹی20 ورلڈکپ میں گروپ اے میں آسٹریلیا، سری لنکا، بھارت اور نیوزی لینڈ کیساتھ رکھا گیا ہے۔

مزید پڑھیں: انڈر-19 ویمنز ٹی20 ورلڈکپ؛ شیڈول کا اعلان، میزبان کون ہوگا؟

سلیکشن کمیٹی نے ٹیم میں صرف ایک تبدیلی کی ہے جو گزشتہ ماہ سری لنکا میں اے سی سی ایشیا کپ کھیلی تھی۔ دائیں ہاتھ کی بیٹر صدف شمس، جو گزشتہ سال جنوبی افریقہ میں ٹی20 ورلڈکپ کھیلی تھیں ٹیم میں نجیہہ علوی کی جگہ واپسی ہوئی ہے۔

نجیہہ علوی بطور ریزرو کھلاڑی ٹیم کے ساتھ سفر کریں گی۔

آئی سی سی ویمنز ٹی20 ورلڈکپ 2024 کیلئے پاکستانی اسکواڈ:

فاطمہ ثنا (کپتان)، عالیہ ریاض، ڈیانا بیگ، گل فیروزہ، ارم جاوید، منیبہ علی (وکٹ کیپر)، نشرہ سندھو، ندا ڈار، عمیمہ سہیل، صدف شمس، سعدیہ اقبال (فٹنس سے مشروط)، سدرہ امین، سیدہ عروب شاہ، تسمیہ رباب اور طوبیٰ حسن۔