پیرالمپکس میں حصہ لینے کے لیے پاکستان کے واحد اتھلیٹ حیدر علی پیرس روانہ

پیرا لمپکس میں ایک سو ستر ممالک کے چار ہزار سےزیادہ اتھلیٹس حصہ لے رہے ہیں

Sports Reporter August 26, 2024

پیرا لمپکس میں ایک سو ستر ممالک کے چار ہزار سےزیادہ اتھلیٹس حصہ لے رہے ہیں

فرانس کے شہر پیرس میں اب پیرا لمپکس کا میلہ سجنے جارہاہے جس کی افتتاحی تقریب اٹھائیس اگست کو ہوگی۔

پاکستان کی نمائندگی حیدرعلی کریں گے۔پیرا لمپکس کے لیے پاکستان کے واحد اتھلیٹ حیدر علی اپنے کوچ اکبرعلی کے ساتھ اسلام آباد سے روانہ ہوئے۔

پیرا لمپکس میں ایک سو ستر ممالک کے چار ہزار سےزیادہ اتھلیٹس حصہ لے رہے ہیں۔ ان کھیلوں میں مختلف جسمانی کمزوریاں رکھنے والے اتھلیٹس کو صلاحیتوں کے اظہار کا موقع ملتاہے،حیدرعلی ایف سینتیس کیٹگری کےڈسکس تھرو ایونٹ میں شریک ہوں گے۔

ڈسکس تھرو میں حیدرعلی چھ ستمبر کو ایکشن میں ہوں گے۔ چار برس پہلے ٹوکیو گیمز میں حیدر علی نے ڈسکس تھرو میں گولڈ میڈل اپنے نام کیاتھا۔گوجرانوالہ سے تعلق رکھنے والے حیدر علی پانچویں بار پیرا لمپکس میں ملک کی نمائندگی کرر ہے ہیں۔

اس سے پہلے انہوں نے لانگ جمپ میں سلور اور برانز میڈل بھی جیت رکھا ہے ۔حیدر علی نے پہلی بار دوہزار آٹھ کی بیجنگ اولمپکس میں لانگ جمپ میں سلور میڈل جیتا۔ دوہزار سولہ ریو اولمپکس میں انہوں نے کانسی کا تمغہ لےکر ملکی پرچم بلند کیا، دوہزار بیس ٹوکیو اولمپکس میں پچپن اعشاریہ چھبیس میٹردور ڈسکس پھینک کر گولڈ میڈل اپنے گلے میں ڈالا تھا۔ دوہزار بارہ لندن اولمپکس میں ان فٹ ہوگئے تھے۔