اداکارکو جیل میں وی آئی پی سہولت دینے پر 7 اہلکار معطل

سوشل میڈیا صارفین نے اداکار سے وی آئی پی برتاؤ پر غصے کا اظہار کیا:فوٹو:سوشل میڈیا

---

بھارتی اداکار کو جیل میں وی آئی پی سہولت دینے پر 7 اہلکاروں کو معطل کردیا گیا۔

بھارتی میڈیا رپورٹس کے مطابق قتل کے الزام میں قید کناڈا کے اداکار درشن کی تصویر سوشل میڈیا پر وائرل ہوئی تھی جس میں وہ جیل اہلکاروں کے ساتھ لان میں بیٹھے چائے پیتے ہوئے اور خوشگوار موڈ میں باتیں کرتے دکھائی دے رہے تھے۔

اداکار کو جیل میں ملنے والے وی آئی پی ٹریٹمنٹ پر عوامی غصے کے بعد کرناٹک کے وزیرداخلہ نے بیان میں کہا کہ بنگلورو جیل کے 7 اہلکاروں کو معطل کردیا گیا ہے۔ پولیس کی ایک خصوصی ٹیم معاملے کی مزید تحقیقات کررہی ہے۔

اداکار درشن اور دیگر 16 افراد رینوکا سوامی نامی شخص کے قتل کے الزام میں قید ہیں۔ پولیس ذرائع کے مطابق 33 سالہ رینوکاسوامی اداکار درشن کا فین تھا اور اس نے اداکار کی بیوی کومبینہ طورپر فحش میسجز بھیجے تھے جس پر مشتعل ہو کر اداکاردرشن نے اپنے ساتھیوں کے ساتھ مل کر رینوکا سوامی کو قتل کردیا تھا۔