خیبرپختونخوا حکومت کا بلوچستان کے شہداء کیلئے پیکج کا اعلان

خیبرپختونخوا حکومت نے بلوچستان میں دہشت گردی کے واقعات میں شہید ہونے والوں شہداء پیکج کا اعلان کردیا۔

وزیراعلیٰ خیبرپختونخوا علی امین گنڈاپور کی جانب سے شہداء کے لواحقین کو خیبرپختونخوا کے شہداء کی طرز پر دس، دس لاکھ روپے امداد کا اعلان کیا گیا ہے۔


دہشت گردی کے واقعات پر بانی چیئرمین، وزیراعلیٰ خیبر پختونخوا علی امین گنڈا پور اور صوبائی حکومت کی جانب سے سخت رنج و غم کا اظہار کیا گیا ہے۔

وزیراعلیٰ نے کہا کہ بھرپور طریقے سے دہشت گردی کے واقعات کی مذمت کرتے ہیں، ہم ان جیسے واقعات کے رنج و الم سے بخوبی واقف ہیں، شہداء کے لواحقین سے ہمدردی رکھتے ہیں۔

صوبائی حکومت نے شمالی وزیرستان میں دہشت گردی میں جاں بحق پانچ افراد کے لیے بھی شہداء پیکج کا اعلان کیا ہے۔