امریکی یوٹیوبر بن کر دنیا کی بدترین جنسی استحصال کے مرتکب ملزم کو 17 سال قید

کئی نابالغ لڑکیوں نے خودکشی کی بھی کوشش کی

ویب ڈیسک August 28, 2024

آسٹریلیا میں کئی نابالغ لڑکیوں کے جنسی ہراسانی کے ملزم کو 17 سال قید کی سزا سنادی گئی

آسٹریلیا میں امریکی نوعمر یوٹیوبر کا روپ دھار کر آن لائن دوستیاں کرکے جنسی ہراسانی کرنے والے آسٹریلوی شخص کو دنیا کی بدترین جنسی استحصال کے جرم میں 17 سال قید کی سزا سنا دی گئی۔

عالمی خبر رساں ادارے کے مطابق گرفتار ملزم میں کی شناخت 29 سالہ محمد زین العابدین رشید کے نام سے ہوئی۔ جس نے خود کو 15 سالہ امریکی یوٹیوبر اسٹار ظاہر کرکے سیکڑوں لڑکیوں سے دوستی کی اور ان کی نجی معلومات حاصل کیں۔

جس کے بعد وہ ان لڑکیوں سے جنسی تعلقات قائم کرنے کے لیے دباؤ ڈالتا تھا۔ اس نے 250 سے زائد کم عمر لڑکیوں کو کیمرے میں آکر نازیبا حرکات کے لیے مجبور کیا۔ متاثرہ تمام لڑکیاں ہی نابالغ تھیں۔

کئی لڑکیوں نے خودکشی کی کوشش بھی کی لیکن ملزم نے ان کی التجاؤں اور تکلیفوں کے باوجود سفاکیت جاری رکھیں۔

آسٹریلوی فیڈرل پولیس اور ویسٹرن آسٹریلیا جوائنٹ اینٹی چائلڈ ایکسپلوٹیشن ٹیم نے مشترکہ تحقیقات کے نتیجے میں رشید کو گرفتار کیا تھا۔

عدالت میں جج نے فیصلہ سناتے ہوئے کہا کہ رشید کا جرم اتنی شدت کا تھا کہ ملک میں اس کیس سے کسی دوسرے کا کیس کا کوئی موازنہ نہیں کیا جا سکتا۔ یہ دنیا کا بدترین جنسی استحصال کا کیس ہے۔