پشاور ہائی کورٹ نے پی ٹی آئی کی کارکن صنم جاوید کی 10 روزہ راہداری ضمانت منظور کرتے ہوئے انہیں پنجاب کی عدالتوں میں پیش ہونے کا حکم دے دیا۔
ایکسپریس نیوز کے مطابق پی ٹی آئی رہنما صنم جاوید کی راہداری ضمانت درخواستوں پر ہائی کورٹ کے جسٹس ڈاکٹر خورشید اقبال نے سماعت کی۔
عدالت نے صنم جاوید کی درخواست منظور کرتے ہوئے انہیں 10 روز کی راہداری ضمانت دیدی۔ عدالت نے صنم جاوید کو پنجاب میں متعلقہ عدالتوں میں پیش ہونے کا حکم دیا۔
صنم جاوید کے وکیل علی زمان ایڈوکیٹ نے کہا کہ میری موکلہ کے خلاف ایک ایف آئی آر لاہور اور ایک میانوالی میں درج ہے۔
جسٹس خورشید اقبال نے وکیل سے استفسار کیا کہ صنم جاوید کی رہائش لاہور میں ہے تو یہ پشاور میں کیا کررہی ہیں؟ کیا انہیں معلوم ہوا تھا کہ ان کے خلاف مقدمات درج ہوئے ہیں؟ٓ اس پر علی زمان ایڈووکیٹ نے جواب دیا کہ یہ ان کی پہلی درخواست ہے اس سے پہلے کہیں پر راہداری ضمانت درخواست نہیں دی۔
صنم جاوید کے وکیل نے موقف دیا کہ موکلہ کو عدالت کے اندر جانے نہیں دیا جارہا اس وجہ سے راہداری ضمانت درخواست یہاں دائر کی، عدالت نے کہا کہ 10 دن کی راہداری ضمانت دیتے ہیں یہ وہاں پیش ہوجائیں۔
عدالت نے ایک لاکھ روپے کے ضمانتی مچلکے جمع کرنے کا حکم دیتے ہوئے کہا کہ 10 دن میں درخواست گزار وہاں متعلقہ عدالت میں پیش ہوجائیں۔