گبول ٹاؤن پولیس نے اتوار اور پیر کی درمیانی شب مبینہ مقابلے کے بعد 2 زخمیوں سمیت 3 ڈاکوؤں کو گرفتار کر لیا۔

ترجمان پولیس کے مطابق مبینہ پولیس مقابلہ بفرزون سیکٹر 16/ بی میں ہوا، دونوں زخمی ڈاکوؤں کو طبی امداد کے لیے عباسی شہید اسپتال منتقل کر دیا گیا ہے۔

پولیس کے مطابق زخمی حالت میں گرفتار ملزمان کی شناخت احسان اللہ ولد غلام قادر اور سیف اللہ ولد مرزا محمد کے ناموں سے کی گئی جبکہ تیسرے گرفتار ملزم نے اپنا نام لالا ولد رؤف بتایا ہے۔

گرفتار ملزمان کا ایک ساتھی موقع سے فرار ہونے میں کامیاب ہوگیا۔

پولیس کا کہنا ہے کہ گرفتار ملزمان سے 2 پستول بمعہ گولیاں، 9 چھینے گئے موبائل فونز، لیپ ٹاپ، نقد رقم اور موٹرسائیکل برآمد کی گئی۔