ادارے جب تک اپنی ناکامی تسلیم نہیں کریں گے اس وقت تک بہتری نہیں آئیگی امیرجماعت اسلامی

جماعت اسلامی کے امیر حافظ نعیم الرحمن نے کہا ہے کہ ادارے جب تک اپنی ناکامی تسلیم نہیں کریں گے اس وقت تک بہتری نہیں آئے گی۔


حافظ نعیم الرحمن نے جماعت اسلامی کی ملک گیر ممبر سازی مہم کا آغاز کے موقع پر منصورہ لاہور میں پریس کانفرنس کرتے ہوئے کہا کہ ملک میں جو حالات ہیں یہ پارلیمنٹ، اسٹیبلشمنٹ،عدلیہ اور ملٹری کی ناکامی ہے۔ ادارے جب تک اپنی ناکامی تسلیم نہیں کریں گے بہتری نہیں آئے گی۔

حافظ نعیم الرحمن کا مزید کہنا تھا کہ آئی پی پیپز کا ٹیکس معاف کیا ہوا ہے،غریب آدمی ٹیکس دیتا ہے، جوآئی ایم ایف کی غلامی میں گیا وہ مستحکم نہیں ہوسکا، آئی پی پیز کو انکم ٹیکس میں 13 سو ارب کی چھوٹ دی گئی۔ جماعت اسلامی فرشتہ نہیں۔ غلطیاں اور کوتاہیاں کرسکتے ہیں لیکن ہم سب مل کر جدوجہد کریں گے۔ رواں ماہ 50 لاکھ افراد کو جماعت اسلامی کا ممبر بنائیں گے، جماعت اسلامی وہ جماعت ہے جو تمام لسانی اکائیوں کو اکٹھا کرسکتی ہے، پاکستان انشااللہ قائم رہیگا اور جماعت اسلامی اپنا کردار ادا کرے گی۔ میڈیامالکان سے مطالبہ کرتے ہیں کہ وہ اپنے کارکنان کو جو ہرطرح کے حالات میں کام کرتے ہیں ان کو ان کے حقوق دیں۔