راولپنڈی 13 سال سے مطلوب خطرناک اشتہاری ملزم سعودی عرب سے گرفتار
ملزم کے خلاف سال 2011 میں تھانہ بیگوالا سیالکوٹ میں مقدمہ درج ہوا تھا
ایف آئی اے این سی بی انٹرپول نے کارروائی کرتے ہوئے 13 سال سے مطلوب خطرناک اشتہاری ملزم کو سعودی عرب سے گرفتار کر لیا۔
ترجمان ایف آئی اے کے مطابق قتل اور اقدام قتل کے مقدمے میں مطلوب ملزم شاویز احمد کو سعودی عرب سے گرفتار کر کے اسلام آباد ایئرپورٹ منتقل کر دیا گیا۔
ملزم گزشتہ 13 سال سے سیالکوٹ پولیس کو مطلوب تھا جس کے خلاف سال 2011 میں تھانہ بیگوالا سیالکوٹ میں مقدمہ درج ہوا تھا۔
ایف آئی اے این سی بی انٹرپول نے ملزم کی گرفتاری کے لیے ریڈ نوٹس جاری کیا تھا۔ بعدازاں، ملزم کو ایف آئی اے امیگریشن اسلام آباد نے پنجاب پولیس حکام کے حوالے کر دیا۔
ملزم کی حوالگی انٹرپول اسلام آباد کی انٹرپول ریاض کے ساتھ قریبی رابطہ کاری کی وجہ سے ممکن ہوئی۔
ترجمان کا کہنا ہے کہ جدید ٹیکنالوجی سے آراستہ این سی بی انٹرپول 24/7 پوری دنیا کے ساتھ رابطے میں ہے، ملزمان کی گرفتاری کے لیے تمام تر وسائل کو بروئے کار لایا جا رہا ہے۔