معروف پاکستانی سرجن ڈاکٹر شاہد رسول کو برطانیہ میں اعزازی ڈگری تفویض

جناح اسپتال کراچی کے ایگزیکٹیو ڈائریکٹر اور معروف پاکستانی سرجن ڈاکٹر شاہد رسول کو برطانیہ میں اعزازی ڈگری سے نوازا گیا ہے۔

ایکسپریس نیوز کے مطابق یوم دفاع پاکستان کے موقع پر پاکستانی ڈاکٹر شاہد رسول نے بین الاقوامی اعزاز اپنے نام کرلیا، انہیں اعلیٰ کارکردگی کی بنیاد پر اسکاٹ لینڈ رائل کالج آف سرجنز گلاسکو نے اعزازی ڈگری تفویض کی ہے۔


رپورٹ کے مطابق رائل کالج کی جانب سے امتحان کی بنیاد پر دی جانے والی ڈگری اب تک بہت کم ماہرین کو اعزازی طور پر تفویض کی گئی ہے۔

اطلاعات کے مطابق رائل کالج آف سرجنز دنیا کا مقبول اور قدیم ترین ادارہ ہے جہاں کارکردگی وقابلیت کو پرکھا جاتا ہے۔ پروفیسر شاہد رسول نے پاکستانی غریب عوام کیلئے روبوٹک سرجری کی مفت سہولیات فراہم کرنے میں اہم کردار ادا کیا ہے۔