ہم آرٹ کے ذریعے امن کا پیغام پہنچانا چاہتے ہیں صوبائی وزیر ثقافت
آرٹس کونسل آف پاکستان کراچی میں معروف شخصیات کے پورٹریٹس پرمبنی نمائش”ہنڈریڈ ہیروز“ کا انعقاد
آرٹس کونسل آف پاکستان کراچی محکمہ ثقافت سندھ اور وژنری آرٹ الائنس کے مشترکہ تعاون سے "ہنڈریڈ ہیروز" کے عنوان سے آرٹ ایگزیبیشن کا انعقاد احمد پرویز آرٹ گیلری میں کیاگیا جس میں پاکستان کے مختلف شعبہ جات سے تعلق رکھنے والی 100نامور شخصیات کو خراجِ تحسین پیش کیا گیا۔
آرٹ ایگزیبیشن کا افتتاح صوبائی وزیر ثقافت سید ذوالفقار علی شاہ نے کیا انہوں نے کہاکہ سحر شاہ سندھ کی معروف مصورہ ہیں انہوں نے ہر ایک فن پارے میں سندھی اجرک کا استعمال کیا ہے۔
صوبائی وزیر ثقافت سید ذوالفقار علی شاہ نے کہا کہ مصورہ سحر شاہ نے اپنے فن پاروں میں پاکستان سمیت سندھ کے ہیروز کو نمایاں کیا ہے آج احمد پرویز آرٹ گیلری میں سندھ کی ثقافت کو جمع کیا گیا ہے میں تمام نوجوانوں سے کہوں گا کہ انہیں کلچر ایکسچینج پروگرام کرنا چاہیے۔
انہوں نے کہا کہ ملک میں نا اتفاقی پہلے ہی زیادہ ہے اور یہ رنگ پیار کا پیغام پہنچائیں گے میں سحر شاہ رضوی کو خراج تحسین پیش کرتا ہوں ہم آپ کے ذریعے لوگوں تک امن کا پیغام پہنچانا چاہتے ہیں کوشش کررہے ہیں کہ سندھ کے نوجوان آرٹسٹوں کو ٹیلنٹ ہنٹ کے ذریعے پروموٹ کریں۔
مصورہ سحر شاہ رضوی نے کہا کہ آج جن ہیروز کو یہاں سیلیبرٹ کیا میں اس پر پچھلے پانچ سال سے کام کررہی تھی آرٹس کونسل آف پاکستان کراچی کا تعاون کرنے پر شکریہ ادا کرتی ہوں۔
انہوں نے کہا کہ آنے والی نسلوں کو ان ہیروز کے بارے میں جاننے کا واحد ذریعہ آرٹ ہے ایسا پہلی بار ہوا ہے کہ پاکستان میں تمام ہیروز کو ایک ساتھ پورٹریٹ کیا گیا ہے۔
واضح رہے کہ قائداعظم محمد علی جناح، فاطمہ جناح اور علامہ اقبال سمیت نمائش میں 100ہیروز اور ہیروئنز کے پورٹریٹ رکھے گئے ہیں۔