عمران ہاشمی کی پاکستان آمد پر حمائمہ ملک کیا کریں گی اداکارہ نے بتادیا

حمائمہ ملک نے عمران ہاشمی کے ساتھ بالی ووڈ فلم 'راجہ نٹور لال' میں کام کیا تھا : فوٹو : ویب ڈیسک

---

پاکستانی فلم و ڈرامہ انڈسٹری کی معروف اداکارہ حمائمہ ملک نے بالی ووڈ اداکار عمران ہاشمی کی پاکستان آمد پر اپنے ارادے بتا دیے۔

حمائمہ ملک نے حال ہی میں اپنے بھائی و اداکار فیروز خان کے ہمراہ بھارتی صحافی فریدون شہریار کو خصوصی انٹرویو دیا تھا جس میں صحافی نے اداکارہ سے اُن کے ساتھی اداکار عمران ہاشمی سے متعلق سوال پوچھا تھا۔

بھارتی صحافی نے حمائمہ ملک سے سوال کیا تھا کہ اگر عمران ہاشمی پاکستانی آئیں تو پھر آپ کیا کریں گی؟

صحافی نے اپنے سوال کے ساتھ اداکارہ کو دو فرضی آپشنز بھی دیے تھے کہ وہ عمران ہاشمی کو ایئر پورٹ سے برقع پہنا کر لائیں گی تاکہ وہ لڑکیوں سے محفوظ رہیں یا پھر تمام خواتین کو گھروں میں رہنے کا مشورہ دیں گی؟

حمائمہ ملک نے کہا کہ میں تو تمام لڑکیوں کو بتاؤں گی کہ عمران ہاشمی پاکستان آرہے ہیں اور اُن سے کہوں گی کہ آپ اداکار کے استقبال کے لیے ایئرپورٹ پہنچ جائیں۔

اداکارہ نے کہا کہ عمران ہاشمی کو برقع پہنانے کے آپشن پر غور کیا جاسکتا ہے لیکن عمران کو اپنا اسٹار ڈم پسند ہیں، وہ اپنے مداحوں کو اپنے اردگرد دیکھ کر بہت خوش ہوتے ہیں۔

اُنہوں نے انٹرویو کے دوران گفتگو کرتے ہوئے عمران ہاشمی کے ساتھ پوڈکاسٹ کرنے اور بھارتی فلمساز سنجے لیلیٰ بھنسالی کے ساتھ کام کرنے کی خواہش کا اظہار بھی کیا۔

واضح رہے کہ حمائمہ ملک نے سال 2014ء میں ریلیز ہونے والی بالی ووڈ فلم 'راجہ نٹور لال' میں عمران ہاشمی کے ہمراہ مرکزی کردار ادا کیا تھا۔