نواز شریف کا ملک بھر میں دورے کرنے کا فیصلہ
ملک گیر دورے کریں گے، پہلے بلوچستان پھر سندھ اور خیر پختون خوا کے دورے کرینگے بعدازاں پنجاب کے دورے شروع ہونگے، ذرائع
ملک کی موجودہ سیاسی صورتحال کے سبب مسلم لیگ (ن) کے قائد میاں نواز شریف نے سیاسی محاذ پر متحرک ہونے کا فیصلہ کیا ہے۔
ایکسپریس نیوز کو ن لیگ کے ذرائع نے بتایا ہے کہ مسلم لیگ ن کے صدر نواز شریف نے سیاسی محاذ پر متحرک ہونے کا فیصلہ کیا ہے جس کے لیے نوازشریف پہلے مرحلے میں ملک گیر دورے کریں گے، نواز شریف سب سے پہلے بلوچستان کا دورہ کریں گے۔
پارٹی ذرائع کے مطابق نواز شریف بلوچستان کے بعد سندھ اور پھر خیبر پختونخواہ کا دورہ کریں گے، تینوں صوبوں کے بعد نواز شریف پنجاب کے مختلف اضلاع کے دورے شروع کرینگے، نوازشریف جنوبی پنجاب بھی جائیں گے جہاں وہ پارٹی رہنمائوں کی کارکردگی کا جائزہ لیں گے۔
پارٹی ذرائع کے مطابق نواز شریف بلوچستان میں پارٹی کو از سر نو متحرک کرنے کے لیے تنظیم نو کریں گے، نوازشریف پارٹی کے مخلص اور دیرینہ ساتھیوں کو اعلیٰ تنظیمی عہدے دیں گے، پنجاب سمیت ملک بھر میں پارٹی کی نئی تنظیم سازی کا عمل مکمل کیا جائے گا۔
نواز شریف کی ہدایت پر تحصیل کی سطح تک تنظیم سازی کے لئے مشاورت کا عمل پہلے ہی مکمل ہو چکا، نواز شریف کی حتمی منظوری سے نئی تنظیم سازی کا اعلان کیا جائے گا، اگلے مرحلے میں چاروں صوبوں میں یونین کونسل تک پارٹی کی تنظیم سازی کا عمل مکمل کیا جائے گا۔