اینٹی نارکوٹکس فورس نے انٹیلیجنس بیسڈ آپریشن کے دوران منشیات اسمگلنگ گروہ کے 2 اہم کارندے گرفتار کرکے 602 کلوگرام سے زائد منشیات برآمد کر لی۔
ترجمان کے مطابق اے این ایف نے سمندری موٹروے انٹر چینج فیصل آباد کے قریب کار سور 2 ملزمان کو گرفتار کیا، دوران تفتیش ملزمان نے اعظم گارڈن حافظ آباد میں واقع گھر میں منشیات کی موجودگی کا انکشاف کیا۔
ملزمان کی نشاندہی پر اے این ایف کی جانب سے گھر پر چھاپہ مارا گیا جس کے نتیجے میں گھر سے 357 کلو 600 گرام چرس اور 244 کلو 600 گرام افیون برآمد ہوئی۔
ملزمان منشیات خیبر پختونخوا سے پنجاب اسمگل کر کے مختلف علاقوں تک پہچاتے تھے۔ ملزمان سے گروہ کے دیگر ارکان کی گرفتاری کے لیے تفتیش کا عمل جاری ہے۔
ترجمان کا کہنا ہے کہ مذکورہ آپریشن منشیات اسمگلنگ کے خلاف اے این ایف کے عزم کی عکاسی کرتا ہے، اے این ایف ملک کو منشیات سے پاک اور نوجوان نسل کا مستقبل محفوظ بنانے کے لیے پرعزم ہے۔ ملزمان کے خلاف انسداد منشیات ایکٹ کے تحت مقدمہ درج کر لیا گیا ہے۔