آئی ٹی یو گلوبل سائبر سکیورٹی میں پاکستان کی رینکنگ میں بہتری آئی ہے وزیرمملکت آئی ٹی

پاکستان کو آئی ٹی یو گلوبل سائبر سیکیورٹی انڈیکس 2024 میں رول ماڈل قرار دیا گیا ہے، شزا فاطمہ

ویب ڈیسک September 13, 2024

شزا فاطمہ اسلام آباد میں پریس کانفرنس کر رہی تھیں—فوٹو: فائل

وزیرمملکت آئی ٹی شزا فاطمہ خواجہ نے کہا ہے کہ سائبر سیکیورٹی کے شعبے میں پاکستان دنیا میں رول ماڈل کے طور پر سامنے آیا ہے اور آئی ٹی یو گلوبل سائبر سیکیورٹی میں پاکستان کی رینکنگ میں بھی بہتری آئی ہے۔

اسلام آباد میں نیوز کانفرنس کے دوران وزیرمملکت آئی ٹی شزہ فاطمہ خواجہ نے کہا کہ آئی ٹی یو گلوبل سائبر سیکیورٹی انڈیکس 2024 میں پاکستان کو رول ماڈل قرار دیا گیا ہے۔

انہوں نے کہا کہ پچھلی رینکنگ میں عالمی سطح پر پاکستان کی درجہ بندی 79 پر تھی تاہم آئی ٹی کا شعبہ تیزی سے ترقی کر رہا ہے اور سائبرسکیورٹی کے حوالے سے پاکستان دنیا میں ایک رول ماڈل کےطور پر سامنے آیا ہے۔

ان کا کہنا تھا کہ تمام متعلقہ اداروں نے سائبرسیکیورٹی کے حوال ےسے زبردست کردار ادا کیا ہے، فخرہے کہ ہمارے سائبر سیکیورٹی اقدامات کی عالمی سطح پر پذیرائی ہوئی ہے۔

شزا فاطمہ نے کہا کہ سائبرسیکیورٹی کے حوالے سے ہم نے ورکشاپس کا اہتمام کیا ہے، دنیا میں اس وقت سائبر سیکیورٹی کا شعبہ روزگار کی فراہمی کے حوالے سےسرفہرست ہے اور سائبرسیکیورٹی میں روزگارکےمواقع کو مدنظر رکھتے ہوئے نوجوانوں کو تربیت دی جا رہی ہے۔

وزیرمملکت کا کہنا تھا کہ آئی ٹی یو گلوبل سائبر سیکیورٹی میں پاکستان کی رینکنگ میں بہتری آئی ہے۔