شمالی وزیرستان میں بینک اسٹاف کی گاڑی پر فائرنگ سے مینیجر جاں بحق
نجی بینک کی گاڑی میر علی سے بنوں جارہی تھی، نامعلوم افراد نے اندھا دھند فائرنگ کردی، بینک کے دیگر ملازمین بھی زخمی
خیبرپختونخوا کے علاقے شمالی وزیرستان میں نامعلوم افراد نے بینک اسٹاف کی گاڑی پر اندھا دھند فائرنگ کی جس کے نتیجے میں مینیجر جاں بحق ہوگیا۔
ایکسپریس نیوز کے مطابق میر علی سے بنوں جانے والے بینک اسٹاف کی گاڑی پر شمالی وزیرستان میں نامعلوم مسلح افراد نے اندھا دھند فائرنگ کی۔
پولیس کے مطابق فائرنگ کے نتیجے میں بینک مینیجر جاں بحق ہوگئے جبکہ گاڑی میں بیٹھے دیگر افراد زخمی ہوئے ہیں جنہیں ضابطے کی کارروائی اور طبی امداد کیلیے اسپتال منتقل کردیا گیا ہے۔
پولیس کے مطابق واقعے کے بعد بھاری نفری کو جائے وقوعہ بھیج کر شواہد اکھٹے کرلیے ہیں جبکہ تحقیقات بھی کی جارہی ہیں۔