کراچی تھانہ سول لائن کا انویسٹی گیشن انچارج خاتون سے ہتک آمیز رویہ اپنانے پر معطل

ڈی آئی جی ساؤتھ اسد رضا نے سول لائن تھانے کے انویسٹی گیشن انچارج ایس آئی او انسپکٹر عبدالرشید کو معطل کر کے گارڈن پولیس ہیڈ کوارٹر تبادلہ کر دیا اور ایس ایس پی ڈسٹرکٹ سٹی عارف عزیز کو انکوائری افسر مقرر کر دیا۔

انویسٹی گیشن انچارج کی ویڈیو سوشل میڈیا پر وائرل ہوئی تھی جس میں انویسٹی گیشن افسر فریادی خاتون سے انتہائی ہتک آمیز رویہ اپناتے ہوئے انھیں کمرے سے نکل جانے کا بول رہا تھا جبکہ خاتون اپنے بیٹے کی گرفتاری کے بعد انویسٹی گیشن پولیس افسر کے کمرے میں گئی تھی۔


خاتون کی جانب سے الزام عائد کیا گیا ہے کہ پولیس نے میرے بیٹے کو بیدردی کے ساتھ مبینہ طور پر تشدد کا نشانہ بنایا ہے اور مجھ سے مبینہ طور پر رشوت بھی مانگی گئی ہے اور پولیس افسر شراب کے نشے میں بھی تھا خاتون نے الزام عائد کیا ہے کہ پولیس افسر نے انھیں بھی تشدد کا نشانہ بنایا اور دھکے دے کر اپنے کمرے سے نکال دیا

واضح رہے کہ سول لائن پولیس نے وقاص نامی نوجوان کو غیر قانونی اسلحے کے الزام میں گرفتار کر کے مقدمہ درج کیا تھا جبکہ اہلخانہ کا کہنا تھا کہ اسلحہ لائسنس یافتہ ہے اور پولیس نے بلاجواز گرفتار کیا ہے جس کی غیر جانبدار تحقیقات کرائی جائے ۔