پی ٹی آئی کے 6 رہنماؤں کارکنوں کی نظربندی کے احکامات جاری

مراسلے میں پی ٹی آئی کی خواتین ورکرز کے نام بھی شامل ہیں:فوٹو:فائل

---

پاکستان تحریک انصاف ( پی ٹی آئی) کے 5 رہنماؤں اور کارکنوں کی نظر بندی کے احکامات جاری کردئیے گئے۔

انجنئیر یاسر گیلانی سمیت پانچ لوگوں کی نظر بندی کے آرڈر جاری کیے گئے۔ دیگر افراد میں ملک افضل،فضل خان،عامر گیلانی اور فضل داد خان شامل ہیں۔ پانچوں افراد کو 30 دن کے لئے کوٹ لکھپت جیل میں نظر بند کیا جائے۔ اس سے قبل غلام محی الدین دیوان کے نظر بندی آرڈر جاری کیے جا چکے ہیں جبکہ پولیس اب تک 50 سے زائد کارکنوں کو حراست میں بھی لے چکی ہے۔

قبل ازیں لاہور پولیس نےپاکستان تحریک انصاف ( پی ٹی آئی) کے 42 رہنماؤں اور کارکنوں کی نظر بند ی کے لیے صوبائی محکمہ داخلہ کو مراسلہ بھجوایا تھا۔ مراسلہ اقبال ٹاؤن ڈویژن پولیس کی جانب سے صوبائی وزارت داخلہ کو بھجوایا گیا۔ نظربندی کے لیے بھیجے گئے مراسلے میں پی ٹی آئی کے میاں اسلم اقبال، میاں محمود الرشید کے بیٹے میان حسن،مہر واجد ، وقاص امجد، ندیم بارسمیت 42 افراد کے نام شامل ہیں۔ فہرست میں خواتین ورکرز کے نام بھی شامل کیے گئے ہیں۔

مراسلے کے مطابق فہرست میں شامل افراد افواج پاکستان کیخلاف انتشار پھیلاتے ہیں اور لوگوں کو نجی وسرکاری املاک کو نقصان پہچانے کی ترغیب دیتے ہیں۔ ان افراد کی وجہ سے امن وامان کے مسائل پیدا ہونے کا خدشہ ہے لہذا ان کے 90 یوم کے نظر بندی کے احکامات جاری کیے جائیں۔