وزیراعظم کی مالدیپ کے صدر سے ملاقات دیرینہ تعلقات کے فروغ پر زور

وزیراعظم شہبازشریف اور ڈاکٹر محمد معیزو کے درمیان نیویارک میں ملاقات ہوئی—فوٹو: پی آئی ڈی

---

وزیراعظم شہباز شریف اور مالدیپ کے صدر ڈاکٹر محمد معیزو نے دونوں ممالک کے درمیان دیرینہ تعلقات کے فروغ پر زور دیتے ہوئے تجارت، سیاحت، تعلیم، سرمایہ کاری اور موسمیاتی تبدیلی کے شعبوں میں تعاون بڑھانے کے لیے عزم کا اعادہ کیا۔

وزیراعظم کے دفتر سے جاری بیان کے مطابق نیویارک میں اقوام متحدہ کی جنرل اسمبلی کے 79ویں اجلاس کے موقع پر وزیراعظم شہباز شریف کی مالدیپ کے صدر ڈاکٹر محمد معیزو سے دو طرفہ ملاقات ہوئی۔

اعلامیے میں کہا گیا کہ ملاقات کے دوران دونوں رہنماؤں نے پاکستان اور مالدیپ کے درمیان دیرینہ اور گہرے تعلقات کے فروغ پر زور دیا۔

وزیراعظم شبہاز شریف نے اس موقع پر مالدیپ کے ساتھ تجارت، سیاحت، تعلیم، سرمایہ کاری اور موسمیاتی تبدیلی کے شعبوں میں تعاون بڑھانے کے لیے پاکستان کے عزم کا اعادہ کیا۔

ملاقات کے دوران دونوں رہنماؤں نے اپنے اپنے ممالک میں اقتصادی ترقی اور پائیدار ترقی کو فروغ دینے کے لیے باہمی عوامی روابط اور باہمی تعاون کی کوششوں میں اضافے کی ضرورت پر اتفاق کیا۔

وزیراعظم کے دفتر سے جاری بیان میں کہا گیا کہ دونوں رہنماؤں نے خطے کے امن، خوش حالی اور استحکام کے لیے مل کر کام کرنے اور جنوبی ایشیائی ممالک کی مشترکہ ذمہ داری کے حوالے سے تبادلہ خیال کیا اور زیربحث آنے والے امور پر اتفاق کیا۔