راولپنڈی؛ ڈینگی کے باعث ایک اور مریض چل بسا، تعداد 5ہوگئی

راولپنڈی میں ڈینگی کے باعث 45 سالہ خاتون دوران علاج دم توڑ گئی۔

خاتون کو 20 ستمبر کو بے نظیر بھٹو اسپتال کے ڈینگی وارڈ میں داخل کیا گیا تھا، خاتون کی ٹیسٹ رپورٹس میں ڈینگی کی تصدیق ہوئی تھی۔ خاتون کنٹونمنٹ علاقے کے مصریال روڈ کی رہائشی تھی۔

ذرائع محکمہ صحت کے مطابق ڈینگی کا شکار ہو کر جاں بحق ہونے والوں کی تعداد پانچ ہوگئی۔

راولپنڈی میں گذشتہ 24 گھنٹوں کے دوران 110 افراد میں ڈینگی پازیٹیو ہونے کی تصدیق ہوئی جبکہ اسپتالوں میں زیر علاج ڈینگی پازٹیو کے مریضوں کی تعداد 185 ہوگئی۔

محکمہ صحت کے مطابق اب تک ڈینگی سے متاثرہ کنفرم مریضوں کی تعداد 960 تک پہنچ گئی۔

گزشتہ 20 گھنٹوں میں ڈینگی کے 54 مریض پوٹھوہار ٹاؤن اور 9 میونسپل کارپوریشن علاقوں سے آئے، راولپنڈی کنٹونمنٹ 17 اور پوٹھوہار رولر  سے 15 مریض میں ڈینگی کی تصدیق ہوئی۔ چکلالہ کنٹونمنٹ سے 5 اور کلرسیداں سے 4 مریض آئے۔