کراچی: کراچی بچاؤ تحریک کی جانب سے محفل داستان گوئی کا انعقاد کیا گیا جس میں معروف فن کار فواد خان نے اپنے فن کا مظاہرہ کیا۔
اسکاؤٹ آڈیٹوریم میں منعقدہ اس تقریب میں کنوینر کراچی بچاؤ تحریک سینٹرل کمیٹی خرم علی نیئر، کراچی بچاؤ تحریک گجرنالہ کور کمیٹی کے کنوینر عارف شاہ و دیگر اراکین، گجرنالہ متاثرین کی نمایاں تعداد اور دیگرطبقہ ہائے فکر سے تعلق رکھنے والے افراد نے شرکت کی۔
داستان گوئی کی اس محفل میں معروف داستان گو فواد خان نے اپنے فن کا مظاہرہ کیا اور حاضرین سے خوب داد سمیٹی، سینئر صحافی و تجزیہ نگار وارث رضا نے اس تقریب میں خصوصی شرکت کی اور پروگرام کے آغاز میں سماجی المیہ سنایا۔
پروگرام کے آغاز میں عارف شاہ کنوینر کراچی بچاؤ تحریک گجر نالہ کور کمیٹی نے کراچی بچاؤ تحریک کی مختصر تاریخ پیش کرتے ہوئے بتایا کہ کراچی بچاؤ تحریک 2018 میں کراچی کے مظلوم عوام کی دادرسی کے لیے قائم کی گئی تھی، اور اسی کی جدوجہد کی بدولت آج گجر، اورنگی اور محمود نالہ متاثرین کی آباد کاری اور انہیں حکومت کی جانب سے متبادل جگہ اور گھروں کی تعمیر کے لیے رقم ملنے کا مرحلہ آیا ہے۔
پروگرام کے آخر میں کنوینر کراچی بچاؤ تحریک سینٹرل کمیٹی خرم علی نیئر نے مہمانوں کی آمد پر ان کا شکریہ ادا کیا۔