ملائیشیا کے وزیراعظم انورابراہیم تین روزہ دورے پرپاکستان پہنچ گئے
وزیراعظم شہبازشریف نے معززمہمان کا پرتپاک استقبال کیا، اکیس توپوں کی سلامی دی گئی
وزیراعظم محمد شہباز شریف کی دعوت پر ملائیشیا کے وزیراعظم داتو سری انور ابراہیم پاکستان کے تین روزہ سرکاری دورے پر اسلام آباد پہنچ گئے۔
ملائیشیا کے وزیراعظم نور خان ایئربیس پہنچے جہاں وزیراعظم شہبازشریف نے معززمہمان کا پرتپاک استقبال کیا۔ پاکستان آمد پر داتو سری انور کو 21توپوں کی سلامی دی گئی جبکہ روایتی لباس میں ملبوس بچوں نے وزیراعظم انورابراہیم کوپھول پیش کیے۔
اس کے علاوہ پاک فوج کے چاق چوبند دستے نے معززمہمان کوسلامی دی۔ وزیراعظم انوار ابراہیم کے ہمراہ اعلیٰ سطح کا وفد بھی ہے۔ وزیراعظم انورابراہیم پاکستانی قیادت سے ملاقاتوں میں دوطرفہ تعلقات پرتبادلہ خیال کریں گے۔
نائب وزیراعظم اسحاق ڈار،وفاقی کابینہ کے ارکان بھی ملائشیا کے وزیراعظم کے استقبال کیلیےموجود تھے۔
ملائیشیا کے وزیراعظم تین روزہ دورے میں وزیراعظم محمد شہبازشریف، صدر مملکت آصف علی زرداری سے بھی ملاقات کریں گے۔ اس کے علاوہ ملائیشیا کے وزیرِ اعظم کے ہمراہ اعلی سطح کاروباری شخصیات و سرمایہ کاروں کے وفد کی بھی پاکستان آمد ہوئی ہے۔
وفد پاکستانی کاروباری شخصیات و سرمایہ کاروں سے ملاقات کرے گا، جس سے دونوں ممالک کے مابین تجارت و سرمایہ کاری کو فروغ ملے گا، ملائیشیا کے وزیراعظم پاکستان-ملائیشیا بزنس فورم میں شرکت بھی کریں گے۔