راولپنڈی: پی ٹی آئی کارکنوں کی مختلف مقدمات میں پکڑ دھکڑ جاری ہے، اسی سلسلے میں مزید 170 ملزمان کو گرفتار کرلیا گیا۔
28 ستمبر کو لیاقت باغ (راولپنڈی) میں پاکستان تحریک انصاف کے احتجاج، جلاؤ گھیراؤ اور توڑ پھوڑ پر درج مقدمات میں نامزد ملزمان کی گرفتاریوں کے لیے کارروائیاں جاری ہیں اور پولیس نے مختلف آپریشنز میں مقدمات میں نامزد 170 ملزمان کو گرفتار کرلیا ہے۔
احتجاج کے دوران توڑ پھوڑ اور جلاؤ گھیراؤ کے مقدمات میں اب تک گرفتار کیے گئے ملزمان کی مجموعی تعداد 300 سے زیادہ ہو چکی ہے۔ پولیس کی جانب سے ملزمان کی گرفتاری کے لیے سوشل میڈیا پر موجود وڈیوز کے ذریعے بھی شناخت کی جا رہی ہے، اس کے علاوہ سیف سٹی کیمروں کی فوٹیجز کے ذریعے بھی ملزمان کو تلاش کیا جا رہا ہے۔
ایس ایس پی انویسٹی گیشن نے پولیس ٹیموں کو نامزد ملزمان کی گرفتاری کے لیے تمام وسائل بروئےکار لانے کی ہدایت کی ہے۔