بھارتی تاجروں کی پہلی بار ٹریلین ڈالرز کی تاریخی کمائی گوتم اڈانی اوّل نمبر پر

رواں برس ڈالرز کی کمائی کے لحاظ سے بھارت کے لیے خوش قسمت ترین سال ثابت ہو رہا ہے جس میں ملک کے 100 امیر ترین بزنس ٹائیکونز کی مجموعی دولت نے پہلی بار ٹریلین ڈالر کے سنگ میل کو عبور کیا۔

امریکا کے عالمی شہرت یافتہ مالیاتی جریدے فوربس کے مطابق بھارت کے 80 فیصد سے زیادہ امیر ترین ٹائیکونز کی دولت میں گزشتہ برس کے مقابلے میں ریکارڈ اضافہ ہوا جب کہ 2019 کے مقابلے میں دو گنا دولت ہوگئی۔

فوربس کے بقول فہرست میں شامل ان 80 امیر تاجروں میں سے 6 کی دولت میں فی کس 10 ارب ڈالر یا اس سے زیادہ اضافہ ہوا جب کہ 58 تاجروں میں سے ہر ایک نے رواں برس ایک ارب یا اس سے زیادہ ڈالر کمائے۔

اس سال 100 بھارتی تاجروں کی مجموعی دس کھرب ڈالر کی کمائی میں ابتدائی 5 امیر ترین تاجروں نے بطور گروپ تقریباً 120 بلین ڈالر کمائے جب کہ فہرست میں سرفہرست 12 تاجروں نے مجموعی دولت کا نصف حصہ کمایا۔


فوربس کی بھارت کے 100 امیرترین افراد کی فہرست 2024 میں سب سے زیادہ ڈالر کمانے والے بزنس مین گوتم اڈانی ہیں کیوں کہ انھوں نے رواں برس 48 بلین ڈالرز کمائے جو ان کی دولت میں 71 فیصد اضافے کا باعث بنا۔ اس خاندان کے مجموعی اثاثے 116 ارب ڈالر ہوگئے۔

مکیش امبانی رواں برس بھی بھارت کے امیر ترین بزنس مین کی فہرست میں 119.5 ارب ڈالر کے مجموعی اثاثوں کے ساتھ اوّل نمبر پر ہیں تاہم انھوں نے رواں برس 27.5 ارب ڈالر کمائے۔

اس طرح رواں برس ڈالرز کی کمائی میں 48 بلین ڈالر کمانے والے گوتم اڈانی نے مکیش امبانی کو پیچھے چھوڑ دیا۔