ویمنز ٹی 20 ورلڈ کپ: آسٹریلیا نے پاکستان کو شکست دے کر سیمی فائنل میں جگہ بنالی

دبئی: ویمنز ٹی 20 ورلڈ کپ میں آسٹریلیا نے پاکستان کو 9 وکٹوں سے شکست دے کر سیمی فائنل میں جگہ بنا لی۔

دبئی میں کھیلے گئے ایونٹ کے 14 ویں میچ میں آسٹریلیا کی دعوت پر پہلے بیٹنگ کرتے ہوئے پاکستان کی ٹیم  19.5 اوورز میں 82 رنز بنا کر آؤٹ ہوگئی۔

پاکستان کی جانب سے عالیہ ریاض 26 رنز بنا کر نمایاں رہیں۔ سدرہ امین 17، ارم جاوید 12، ندا ڈار 10، کپتان منیبہ علی 7، صدف شمس 3، طوبیٰ حسن 3، عمیمہ سہیل 3، عروب شاہ اور نشرہ سندھو 0 رن بنا کر آؤٹ ہوئیں۔

آسٹریلیا کی جانب سے ایشلی گارڈنر نے 4 کھلاڑیوں کو آؤٹ کیا۔

جورجیا ویرہم اور اینابیل سدر لینڈ نے 2، 2 جبکہ میگن شُوٹ اور سوفی مولینیکس نے 1، 1 وکٹ حاصل کی۔

جواب میں 83 رنز کا ہدف کینگروز نے 11 اوورز میں 1 وکٹ کے نقصان پر حاصل کر لیا۔

آسٹریلیا کی جانب سے کپتان الیسا ہیلی 37 رنز بناکر نمایاں رہی اور ریٹائرڈ ہرٹ ہو کر پویلین لوٹ گئیں۔ بیتھ مونے 15 رنز بنا کر آؤٹ ہوئیں۔

الیس پیری 22 اور ایشلی گارڈنر 7 رنز بنا کر ناقابلِ شکست پویلین لوٹیں۔

پاکستان کی جانب سے سدرہ امین نے 1 وکٹ حاصل کی۔