'الٹرنیٹو باکس آفس کوئین' تاپسی پنوں کی کامیابی کا راز کیا ہے؟

 ممبئی: بالی ووڈ اداکارہ تاپسی پنوں نے حالیہ انٹرویو میں اپنے کیریئر کے سفر اور “الٹرنیٹو باکس آفس کوئین” کے لقب پر کھل کر بات کی۔ نیوز ایکس کو دیے گئے انٹرویو میں تاپسی پنوں نے ہنستے ہوئے اس لقب کو اپنایا اور اعتراف کیا کہ ان کا کیریئر شروع سے ہی مختلف راستے پر چل پڑا تھا۔

تاپسی نے کہا، “جو چیز روایتی نہیں ہوتی، وہ الٹرنیٹو بن جاتی ہے۔ میں نے روایتی فلمیں کرنے کی کوشش کی، لیکن وہ میرے لیے نہیں تھیں۔” انہوں نے یہ بھی کہا کہ جب بھی انہوں نے روایت کے خلاف قدم اٹھایا، تب ہی انہیں اصل نتائج ملے۔

انہوں نے مزید کہا کہ فلم ساز اور ہدایت کار اب انہیں روایتی کردار پیش کرنے سے کتراتے ہیں، کیونکہ وہ جانتے ہیں کہ تاپسی انہیں قبول نہیں کریں گی۔ “یہ کردار شاید فلم کو نقصان پہنچا سکتے ہیں،” تاپسی نے مذاق کرتے ہوئے کہا۔

فلم ‘پھر آئی حسین دلربا’ کی شاندار کامیابی کے بعد، تاپسی فلم ‘کھیل کھیل میں’ میں نظر آئیں اور اب وہ اپنی آنے والی فلم ‘گندھاری’ کی تیاری میں مصروف ہیں، جس کی ہدایتکاری دیواسیش مکھیجا کر رہے ہیں اور اسے کنیکا ڈھلوں نے لکھا ہے۔