پشاور میں نامعلوم ملزمان کی پولیس موبائل پر فائرنگ 2 اہلکار شہید

پشاور میں نامعلوم موٹر سائیکل سواروں کی پولیس موبائل پر فائرنگ کے نتیجے میں 2 اہلکار شہید ہوگئے۔

ایکسپریس نیوز کے مطابق پشاور کے علاقے حیات آباد میں نامعلوم موٹر سائیکل سواروں نے پولیس وین کو اس وقت نشانہ بنایا جب وہ گشت پر تھی۔ پولیس وین میں 4 اہلکار سوار تھے جنہیں موٹر سائیکل پر سوار 2 ملزمان نے پوزیشن سنبھال کر نشانہ بنایا اور اندھا دھند فائرنگ کردی جس کے نتیجے میں 2 اہلکار زخمی ہوگئے جنہیں قریبی اسپتال منتقل کیا جارہا تھا تاہم وہ زخموں کی تاب نہ لاسکے۔دوسری جانب واقعے کے بعد پولیس کی نفری موقع پر پہنچ گئی اور علاقے کو گھیرے میں لے کر ملزمان کی تلاش شروع کردی۔

واضح رہے کہ چند روز قبل آئی جی خیبرپختونخوا ناصر خان درانی کا کہنا تھا کہ پولیس کی جانب سے شروع کئے گئے سرچ آپریشن کے باعث دہشتگرد اہلکاروں کو نشانہ بنا رہے ہیں۔