امریکی صدر جو بائیڈن 5 نومبر کو ہونے والے صدارتی الیکشن کے لیے آج ’قبل از پولنگ ڈے ‘ کے تحت اپنا حقِ رائے دہی استعمال کریں گے۔
امریکی میڈیا کے مطابق کورونا وبا کے دوران پہلی بار ہجوم اور رش سے بچنے کے لیے ’قبل از پولنگ ڈے‘ ووٹ کاسٹ کرنے کی سہولت متعارف کرائی گئی تھی۔
اس سہولت سے بزرگ شہری اور بیمار افراد مستفید ہوسکتے تھے۔ اس کامیاب تجربے کو کورونا وبا کے بعد بھی سہولت کے طور پر جاری رکھنے کا فیصلہ کیا گیا۔
جس کے تحت امریکا کی متعدد ریاستوں میں قبل از پولنگ ڈے ووٹ کاسٹ کیے جا رہے ہیں۔ سابق امریکی صدر 100 سالہ جمی کارٹر نے بھی اس سے فائدہ اُٹھایا۔
آج کسی وقت موجودہ امریکی صدر 81 سالہ جوبائیڈن بھی قبل از پولنگ ڈے اپنا ووٹ کاسٹ کریں گے۔ جس کے لیے خصوصی انتظامات کیے گئے ہیں۔
ادھر حکمراں جماعت کی صدارتی امیدوار اور جوبائیڈن کی قریبی ساتھی کملا ہیرس نے اپنی انتخابی مہم کو مزید تیز کردیا ہے۔
دوسری جانب ان کے حریف امیدوار ڈونلڈ ٹرمپ بھی کملا ہیرس کی پالیسیوں کو کڑی تنقید کا نشانہ بنا رہے ہیں جو اس وقت ملک کی نائب صدر بھی ہیں۔