کرنٹ لگنے سے ہلاکتوں پر گیپکو پر 2 کروڑ 30 لاکھ روپے جرمانہ
جاں بحق ہونے والے 6 شہریوں کے لواحقین کو 40، 40 لاکھ روپے معاوضہ دینے کا حکم
نیپرا نے اعلامیے میں کہا کہ جولائی کی مد میں کمی ہوگی—فوٹو: فائل
اسلام آباد: نیشنل الیکٹرک پاور ریگولیٹری اتھارٹی (نیپرا) نے کرنٹ لگنے سے 6 شہریوں کی ہلاکتوں پر گوجرانوالہ الیکٹرک پاور کمپنی (گیپکو) پر 2 کروڑ 30 لاکھ روپے جرمانہ کر دیا۔
نیپرا نے شوکاز جاری کرکے کمپنی سے جواب طلب کیا تھا اور گیپکو کا جواب تسلی بخش نہ ہونے کی وجہ سے مسترد کیا گیا۔
نیپرا نے گیپگو پر جرمانے کا حکم نامہ جاری کرتے ہوئے جاں بحق ہونے والے 6 شہریوں کے لواحقین کو 40، 40 لاکھ روپے معاوضہ دینے کا حکم دیا۔
نیپرا نے متاثرہ خاندان کے وارثین کو ملازمت دینےکی بھی ہدایت کردی اور گیپکو کو 15روز کے اندر نیپرا کے نامزد کردہ بینک میں جرمانہ جمع کرانےکی ہدایت کی۔
گیپگو کے زیر انتظام علاقوں میں 2022-23 میں 9 ہلاکتیں ہوئیں تھیں، کرنٹ لگنے سے مرنے والوں میں 6 شہری اور 3 گیپگو کے ملازمین شامل تھے۔
نیپرا نے 30 اگست 2023 کوجاری شوکاز نوٹس پرگیپکو کےخلاف کارروائی کا آغاز کیا تھا۔