گالف کورس میں گم ہونے والی انگوٹھی 54 برس بعد مل گئی

امریکا میں ایک شخص کو پینسلوینیا گالف کورس میں گم ہونے والی اپنی نیول اکیڈمی کی انگوٹھی 54 برس بعد مل گئی۔

82 سالہ ڈیوڈ لورینزو کا کہنا تھا کہ ان کی 1964 کی کلاس رنگ پٹسبرگ کے قریب واقع یونین ٹاؤن کنٹری میں اس وقت کھوئی تھی جب وہ اپنے والد کے ساتھ گالف کھیل رہے تھے۔

70 سالہ مائیکل زینرٹ حال ہی میں اس کلب میں گالف کھیل رہے تھے جب انہیں مٹی میں ایک چیز چمکتی ہوئی دِکھی، یہ چیز حالیہ دنوں میں ہونے والی بارشوں کے بعد سامنے آئی تھی۔

مائیکل زینرٹ نے بتایا کہ انہوں نے جب یہ چمکتی ہوئی چیز دیکھی تو سوچا کہ یہ کوئی کین کا ٹیب ہے۔ اس خیال سے کہ کوئی اس پر پیر نہ رکھ دے جب اس شے کو باہر نکالا تو دیکھا کہ یہ ایک انگوٹھی تھی۔

مائیکل نے انگوٹھی کے مالک کی آن لائن تلاش کی اور انہیں ایک پوڈ کاسٹ ملی جہاں ڈیوڈ اپنے فوج کے تجربات کے متعلق بات کر رہے تھے۔

وہ فلوریڈا گئے اور ڈیوڈ کو نیشنل نیول ایوی ایشن میوزم میں یہ انگوٹھی واپس کی۔