سوشل میڈیا پر خاتون کی طلاق پر جشن منانے کی ویڈیو وائرل ہورہی ہے جس نے تہلکہ مچا دیا ہے۔
شوہر اور بیوی کے رشتے کا ختم ہونا ان سمیت دو خاندانوں کیلئے انتہائی دردناک وقت ہوتا ہے تاہم اب بدلتے وقت کے ساتھ عجیب و غریب ٹرینڈز نے رشتوں کے جڑنے اور ختم ہونے کو بھی فیشن بنا دیا ہے۔
ایسی ہی ایک ویڈیو سوشل میڈیا پر وائرل ہو رہی ہے جس میں ایک خاتون کو اپنی طلاق کا جشن مناتے دیکھا جا سکتا ہے جبکہ اس کے ساتھ دوست احباب بھی موجود ہیں اور خوشی کا اظہار کرتے دکھائی دے رہے ہیں۔
نیلے جوڑے میں ملبوس خاتون طلاق کا جشن مناتے ہوئے کیک کاٹ رہی ہیں جس پر ’ہیپی ڈائیوورس‘ لکھا ہوا ہے۔ یہی نہیں بلکہ خاتون دوپٹے پر اپنے شوہر کا لکھا نام قینچی سے کاٹ کر ٹکڑے کرتی ہے اور شادی کی تصاویر بھی پھاڑتی دکھائی دے رہی ہے۔
سوشل میڈیا پر یہ ویڈیو آگ کی طرح پھیل رہی ہے جس پر صارفین کی جانب سے شدید غم و غصے کا اظہار کیا جارہا ہے۔
سوشل میڈیا صارفین کا کہنا ہے کہ اس سے قبل بھی ایک خاتون کی اس طرح کی ویڈیو سامنے آئی تھی اور اب طلاق کو بھی فیشن بنا کر اس کا جشن منانا ٹرینڈ بنانے کی کوشش کی جارہی ہے۔
سوشل میڈیا صارفین کی جانب سے خاتون کو شدید تنقید کا نشانہ بنایا جارہا ہے۔ ایک صارف نے لکھا کہ چاہے آپ ایک غلط شخص سے رشتہ ازدواج میں منسلک تھیں مگر طلاق کا جشن منا کر اس پاکیزہ رشتے کی تضحیک نہیں کرنی چایئے۔
ایک اور صارف نے لکھا کہ کسی بھی عورت یا مرد کیلئے ایک تکلیف دہ تجربہ ہوتا ہے اور اس کا جشن منانے کے بجائے اس کی مذمت کرنی چاہیئے۔