طلاق کے بعد نئی زندگی، عمیر جسوال نے دوسری شادی میں خوشیاں ڈھونڈ لی

پاکستانی گلوکار عمیر جسوال نے اپنی زندگی میں طلاق کے بعد کی مشکلات اور نئی شادی میں خوشی کا اظہار کیا۔ 

عمیر اور اداکارہ ثنا جاوید نے اکتوبر 2020 میں شادی کی تھی مگر گزشتہ سال دونوں نے اپنی راہیں جدا کر لیں۔ سوشل میڈیا پر ایک دوسرے کو ان فالو اور شادی کی تصاویر کو ڈیلیٹ کرنے کے بعد ان کے علیحدگی کی خبریں عام ہوئیں۔ بعد ازاں جنوری میں طلاق کی تصدیق ہوئی جب ثنا جاوید نے کرکٹر شعیب ملک سے شادی کر لی۔

عمیر جسوال نے 7 اکتوبر کو انسٹاگرام پر دلہا کے لباس میں ایک تصویر شیئر کی، جس سے ان کے مداحوں میں ان کی دوسری شادی کے بارے میں تجسس پیدا ہوا، مگر انہوں نے اپنی نئی شریک حیات کی شناخت ظاہر نہیں کی۔ ان کی پوسٹ کو مداحوں نے بہت سراہا اور انہیں نیک خواہشات پیش کیں۔

حال ہی میں ایک انٹرویو میں عمیر نے اپنی طلاق کے بعد زندگی پر بات کرتے ہوئے کہا، "میں بہت خوش ہوں۔ اللہ بہت مہربان ہے اور مجھے یقین ہے کہ وہ ہمیں ایک خاص راستے پر لے جاتا ہے۔" انہوں نے مزید کہا کہ مداحوں کی محبت اور دعائیں ان کے لیے بہت اہم ہیں۔

عمیر جسوال نے اپنی نئی شادی کے بارے میں بات کرتے ہوئے پرائیویسی کی اہمیت پر زور دیا اور کہا کہ وہ چاہتے ہیں کہ لوگ انہیں ان کی کامیابیوں سے پہچانیں نہ کہ ذاتی زندگی سے۔