بالی ووڈ کے لیجنڈری اداکار متھن چکرورتی عرف متھن دا کی سابقہ بیوی دنیا سے رخصت ہوگئیں۔
بھارتی میڈیا رپورٹ کے مطابق ہیلنا لیوک بالی ووڈ کے ماضی کے مقبول اداکار متھن دا کی پہلی بیوی تھیں جو کہ خود بھی اداکاری کی دنیا سے وابستہ تھیں۔
ہیلنا نے اتوار کے روز 3 نومبر کو امریکہ میں آخری سانسیں لیں، ان کی موت کی خبر سوشل میڈیا پر ڈانسر اور اداکارہ کلپنا لیئر کی جانب سے شیئر کی گئی ہے۔
ہیلنا لیوک نے سوشل میڈیا پر اپنی موت سے کچھ دیر قبل ایک نوٹ لکھا تھا جس میں انہوں نے اپنے جذبات کا اظہار کیا تھا۔
اداکارہ نے لکھا کہ ’ عجیب لگ رہا ہے، ملے جلے جذبات اور کوئی پتہ نہیں کیوں، بے چینی ہورہی ہے‘۔
واضح رہے کہ ہیلنا لیوک، جو امیتابھ بچن کی 1985 میں ریلیز ہونے والی فلم ’مرد‘ میں اپنے کردار کے لیے مشہور تھیں، کی متھن چکرورتی سے شادی ہوئی تھی لیکن افسوس کہ ان کی شادی چار ماہ کے اندر ہی ختم ہو گئی اور دونوں نے راہیں جدا کرلیں۔