نیپرا نے ستمبر کے لیے بجلی ایک روپیہ 28 پیسے سستی کردی، کراچی شامل نہیں

نیپرا نے ستمبر کے لیے فیول پرائس ایڈجسٹمنٹ کی مد میں بجلی ایک روپیہ 28 پیسے سستی کردی جس کا اطلاق کے الیکٹرک صارفین پر نہیں ہوگا۔

ایکسپریس نیوز کے مطابق فیول پرائس ایڈجسٹمنٹ برائے ستمبر 2024ء کی مد میں نیپرا نے بجلی 1 روپے 28 پیسے فی یونٹ سستی کردی جس کا نوٹی فکیشن جاری کردیا۔

سی پی پی اے جی نے ایف سی اے کی مد میں 71 پیسے فی یونٹ کمی کی درخواست جمع کروائی تھی، نیپرا نے اس درخواست پر 30  اکتوبر 2024ء کوعوامی سماعت کی۔

قبل ازیں اگست کی فیول چارجز ایڈجسٹمنٹ 86 پیسے فی یونٹ کمی کے ساتھ چارج کیا گیا تھا، ستمبر کا ایف سی اے اگست کی بہ نسبت صارفین سے مزید 42 پیسے فی یونٹ کم چارج کیا جائے گا۔

نیپرا کے مطابق اس کا اطلاق ڈسکوز کے تمام صارفین ماسوائے لائف لائن، پری پیڈ صارف اور الیکٹرک وہیکل چارجنگ اسٹیشنز پر ہوگا،  اس کا اطلاق کے الیکٹرک صارفین پر بھی نہیں ہوگا۔